E tautokohia ana te kaupapa o Ruataniwha e te Kaunihera ā Rohe o Te Matau-a-Maui

Kātahi anō ka whakaae te kaunihera ā-rohe o Te Matau-a-Māui, he ono ki te toru ngā pōti, ki te whakangao i te waru tekau miriona taara ki te pāpuni wai o Ruataniwha, hēoi, he mahi nui tonu kei mua i te aroaro.

Ko tētahi o ngā mate nui, ko te whai pūtea, ao ake i te kore whakaae a Ngāi Tahu ki te whakangao pūtea, ā, ka pērā anō pea te rōpū, He Toa Takitini.

E toru ngā haora te roa i tautohetohe rātou, engari, i whakaae rātou kia whakatō atu i te waru tekau miriona tāra ki te pāpuni wai.

He iti noa iho tērā ki te rua rau whitu tekau mā rima miriona tāra e hiahiatia tonutia ana.

Kātahi anō te rōpū a He Toa Takitini, he rōpū e whakarite ana i ngā kereme tiriti mō Tamatea me Heretaunga, ka tāmoko i te whakaaetanga mātāpono mō te kotahi rau miriona tāra i tēnei marama noa, i whakaarohia mā rātou pea te pūtea e whakangao.

Kō tā te heamana kōrero, ko tā Mike Mohi kōrero,ko tērā pōhēhē tērā, nā rātou i whakataha te rua tekau miriona tāra mō te pāpuni.

I whakawhitiwhiti kōrero ngā marae e iwa o Te Matau a Māui i ngā tau e whā e rima kua hipa, hēoi, ko te āhua nei, kāore rātou i whakaae ki te whakangao pūtea.

He whā tekau miriona rita pūrua te nui o te wai me hoko ia tau, whai take ai te whakatūtanga o te pāpuni wai, ki te pērā, ka mate ngā kaiahuwhenua ki te utu i tētahi utu a tau mō te wai.

E matapaetia ana ka puta te whakatau whakamutunga a te paori tirotiro i mua i te mutunga o ēnei rangi whakatā, heoi, ehara ko tēnā te otinga, nātemea, ka āhei ngā tāngata te āpira i taua whakatau.