E tipu ana te māharahara nā tētahi mahere hōu mō Te Puni Kōkiri

E rere ana ngā māharahara mō te mahere kua whakatakotoria e Te Puni Kōkiri hei whakaheke i te tokomaha o āna tūranga kaimahi mā te whitu tekau mā whā, āpiti atu, te kapinga o ētahi tari ā-rohe e rua kei Te Waipounamu.

He kōrero ēnei nā Te Kāea tonu i whakapuaki inanahi, ā, ahakoa he mahere tonu i tēnei wā- kua toka ko nga awangawanga. 

Kua rua tekau ma whā tau a Jeff Haynes e mahi ana ki Te Puni Kōkiri, koia anake te kaimahi kei te tari i Waiharakeke. He tari ka kati ki te koke i tētahi mahere hōu.  

I raro i te mahere hōu ka kapi hoki te tari a Te Puni Kōkiri ki Waihopai. E ai ki a Michael Skerrit, heamana o Te Rūnanga o Waihopai - ko tōna hapori pēnei ki te Marae o Murihiku nei ka rongo i te uaua.

I raro i te hānganga o mua e toru rau ono tekau mā ono ngā tūranga mahi.

I te mahere hōu, ka heke tēnā ki te rua rau iwa tekau mā rua.

I tēnei wā e waru tekau kē e noho wātea ana.

Ka mutu, neke atu i te haurua o ngā kaimahi o nāianei ka poroa ō rātou tūranga, otirā ka whakaritea he tūnga hou, ā, ka mate rātou ki te tono mō ēnā.  

He mea kōkiri tēnei kaupapa kia whai aronga hou a Te Puni Kōkiri i te Minita Take Maori, i a Pita Sharples, i ngā tau ki muri. Hei tāna i te rangi nei i ngā tau kua horī he maha noa atu ngā kaupapa kua aro nuitia e Te Puni Kōkiri, ka mutu, me hāngai ake tēnā aro.

Hēoi, e ai ki a Nanaia Mahuta, ko te tari matua ki Pōneke anake me whakahōu, kaua ko ngā tari ā-rohe.

E ai ki te hunga kei ngā rohe, e kore e pērā rawa te māmā.

Ki tā Te Puni Kōkiri, hei te paunga o Hereturikōka puta ai he whakatau.