E tiro hōmiromirotia ana Te Puni Kōkiri mō Whānau Ora

E tiro hōmiromirotia ana Te Puni Kōkiri, ao ake i te putanga o tētahi pūrongo i te Ōtita Matua mō Whānau Ora.

E ai ki te pūrongo, tērā ngā hapa i tā te Te Puni Kōkiri whakahaere i te kaupapa Whānau Ora, tae atu rā ki te tītaritanga o ngā pūtea.

E whakamihi ana te pūrongo i te kaupapa o Whanau Ora me tōna tirohanga hou ki te tukunga o ngā ratonga toko i te ora.

Heoi, pērā tonu ki ngā kaupapa hou katoa ara ōna ngoikoretanga, ā, kei ngā pokohiwi o Te Puni Kokiri.

E ai ki te pūrongo a te Otita Matua he kaupapa rangirua a Whānau Ora, ā, kare ōna whāinga e marama kitea ana.

Ko te whakapaunga hoki a Te Puni Kōkiri i ngā pūtea i arohaehaetia.

He kotahi rau toru tekau mā waru miriona te pūtea mō Whānau Ora.  Rua tekau miriona i tau atu ki nga ringaringa o ngā whānau, haurua o te pūtea ki te whakapakari i ngā ratonga, he whitu miriona mō ngā rōpū komihana, ā, he whā tekau mā rua miriona ki ngā mahi whakariterite.     

I tua atu i ngā māharahara mō te āhua whakapau i ngā pūtea, arā hoki ngā kitenga mō tā Te Puni Kokiri kore whakapau i te katoa o te tahua. Ko te māharahara ki te kore e whakamahia, ka riro.

Kāti, e mea ana a Reipa kei ngā pokohiwi o Michelle Hippolite ngā hapa o roto i te pūrongo, he tohu hei ta rātou o ngā raru i te taumata o runga o taua tari.

Tērā tērā, i whakamihia te kaupapa o Whānau Ora hei tirohanga hou ki ngā ratonga toko i te ora, āpiti atu mōna kua toro nei ki ngā whānau noho taumaha.

Kāti, hei te whakapuakanga o te puka tahua a te Kāwanatanga i ngā wiki tata nei kitea ai pēnā ka whai pānga tēnei pūrongo ki ngā pūtea mō Whānau Ora.