Ahakoa te karo a te purongo otita a te Minita i ngā whakapae raweke putea mō Te Pātaka Ohanga, tuturu, e kore e taea te karo i te taumaha i whai ake.
Hei tā Hekia Parata, “In the last twelve hours we have become aware of unsubstantiated as yet but allegations nevertheless that continue about Te Pātaka Ohanga and as a result Dr Sharples' and I have referred those to the Serious Fraud Office.”
E ai ki a Hekia Parata e hangai ana ngā whakapae hou ki te raweke putea, waihoki, he maha tonu ngā tangata kei te keo o te pu.
Tuturu karekau ngā whakapae mō Te Pātaka Ohanga i aruarutia i te purongo otita. Aa karekau nga Minita, te Poari Matua ranei i pirangi ki te kōrero mō taua take ahakoa a matou patai.
E ai ki te poari matua o te Kōhanga reo he kamupene tumataiti whai mana takoha a Te Pātaka Ohanga, otira ehara ia i te ringa pakihi.
Heoi, e ai ki te kaupapa ture a Te Pātaka Ohanga, i whakaturia ia mō ngā mahi ohanga a Te Poari Matua anake.
Apiti atu ko ana hua katoa kaare e whakahokia ana ki te kamupene ano, ka tukuna keetia ki Te Kōhanga Reo ki tētahi ohu takoha kē ranei.
Na whai ano te hiahia o ētahi whānau Kōhanga kia whakautungia ngā whakapae raweke putea, otira kia whakatuwherangia ngā pukapuka.
Apiti atu, i kitea he rima tekau mano taara i Kōhangia ki tētahi mema poari mo ana mahi mō te kereme Tiriti a te Kōhanga reo:
- Me arotake ngā kaupapa here me ngā tikanga kāri nama
- Me māwehe ngā mana ki ngā utunga nama me ngā hōtuku utu kaimahi
- Me rite tonu te whakaemi tika i ngā pepa taunaki utu kaimahi.
He takoha tona tikanga i whakaurua ki te wahanga whāki utu ki te hunga whai hononga ki te poari matua i tana purongo a tau, engari auare ake.
Kaati, ma te utunga koha e mohiotia ana ka kauparengia te utunga taake.
Noreira e rua nga whakatewhanga kei te haere mo Te Pātaka Ohanga i tenei waa, otira, me tatari tonu nga Kōhanga reo kia puta ai he maramatanga.
