E tōtara wāhi rua ngā rangatira o Ngāpuhi i te pōhiritanga mai o te Pirimia ki Waitangi

Kei te tōtara wāhi rua ngā rangatira a iwi, mena rānei ka pōhiritia te Pirimia a John Key ki Te Tii Waitangi Marae ki te whakanui i te rā o Waitangi.  I hui ngātahi ngā rangatira a iwi ki te matapaki i tēnei take. 

Na Kingi Taurua te karanga kia hui a Ngapuhi ki te tautohe i tenei take. 

Hei tā Dover Samuels (Ngati Kuri), "Tukuna te manuhiri karangatia te manuhiri powhiritia te manuhiri i raro i te rangamaria aa me te kawa hoki o te marae o te iwi."

He whakaaro kē ano to te taumata kaumatua o Ngapuhi mai ra ano i hora ki te aroaro o te kawana tianara engari e taria tonu ana mo te whakahoki.

E ai ki a Nuki Aldridge o Te Taumata Kaumatua o Ngapuhi, "Pena e u ana tatou ki nga korero a Te Tiriti o Waitangi he iwi kotahi tatou nera.  Tena pea te kawanatanga te karauna ranei ka hare mai ki te taha o Ngapuhi ki te powhiri I te iwi whanui o Aotearoa whanui."

Hei tā Samuels anō, "Koia tenei te wahanga tuatahi mo Ngapuhi ki te korero kanohi ki te kanohi pehea nga whakaaro mo nga whakahaeretanga o te TPPA.  Koia tena tetahi o nga take nui rawa atu rongonui me nga ahuatanga e pa ana ki te kereme a Ngapuhi me aana nei kaupapa mo nga waiora.  Kei te maha nga kaupapa hei korerotanga hei whakatautanga i roto i tenei hui.  Horekau ko te TPP anake."

Ko te hainatanga a te kawanatanga I te whakaaetanga TPP a te Taite o tenei te putake o te karanga a Kingi Taurua kia kaua e powhiri I te pirimia ki runga I tenei marae a te Paraire.  Ahakoa pehea te tatutanga o tenei take ko te ahua nei e kore e huri tona whakaaro. 

"E kore au e tautoko e kore au e tautoko.  Waiho ma te marae e tuku i te korero.  Mehemea e tautoko ana ratou he pai tera engari ko au e mea ana e kore au e tautoko.  Ka noho tonu au i runga i taku whakapono kei te hee te kawanatanga kei te takatakahi i te mana o te Tiriti kei te takahi i te Whakaputanga.  E mau tonu au ki taua kaupapa ra e kore au e whakaae," hei tā Taurua.

Tena pea hei te roanga ake o te ra tatu ai tenei kaupapa.