Kei Te Huinga Tauira ngā tauira Māori e whakariterite mai ana mō te rangi kōwhiringa pōti o Aotearoa. Ka mutu, ko ētahi kei te pākia e tēnei āhuatanga, e kīa nei, ko te au o Jacinda Ardern.
Ko tā Elijah Pue o Wikitōria Whare Wānanga, he kanohi noa iho nei ngā kaiārahi hou o Reipa.
Tā Elijah o Te Awa o Whanganui, "Kua tini noa iho te mata o te rōpū Reipa kaua ko ngā kaupapa. Nō reira he pākeha tonu ngā whakaaro me ngā kaupapa."
A, horekau tāna pōti mō te whai pānga ki te āhua o Ardern.
"Kei te tuku pōti au ki Te Pāti Māori i te mea he Māori katoa taua pāti. He Māori katoa ngā kaupapa, he Māori ngā tāngata, he Māori te ahurea."
Heoi anō, e wāhirua ana te pōti a Mohi Arena o Tāmaki Makaurau Whare Wānanga.
Tā Mohi o Ngāpuhi Nui Tonu, "Mō te pāti Reipa, i kii mai rātou mō ngā utu o te whare wānanga nei kia kaua mātou ngā tauira e hoatu utu mō tō mātou tau tuatahi, ā, pai tēnā engari he raru pea tāku mō ō rātou take wai."
A, e aro atu ana tēnei kaipōti i Te Taitokerau, he tuku i tana pōti-tangata ki a Hone Harawira, tāna pōti-pāti ka tukuna ki a Reipa, tātemea kei te tūranga tuarua a Kelvin Davis i te rārangi o Reipā.
"Ko tā Kelvin Davis mā ngā iwi katoa te wai. Engari ko tāku e hē rawa atu ana tērā, nā reira ko tāku he whai i ngā kōrero a Hone Harawira e kiia nei ko te wai Māori mā te Māori."
Engari anō a Eli Toeke o Te Rōpū Māori o Ōtākou Whare Wānanga, e tautoko marika ana ai ia a Reipa.
Tā Eli o Ngāti Hine, "Ka tāea e rātou te whakatika i tō rātou hē mō Te Takutai Moana, he wā anō tēnei e āhei ai te kimi tika anō i te tautoko a te Māori."
Tā Geneveine Wilson o Te Mana Ākonga mō Te Huinga Tauira, ko tā te āhua Ardern he āhua whakarerekē anō i te Kāwanatanga.
Tā Geneveine o Ngāti Porou, "I tēnei wā ko Reipa te aronga nui, tātemea kua tae te wā kia tini te kāwana o naianei, ā, ka tāea e Reipa. Engari ko te tumanako ka piri atu rātou ki Te Rōpū Kākāriki me Te Pāti Māori."
Koni i te rua rau whitu tekau ngā tauira Māori kei Te Huinga Tauira, ā, hei āpōpo tae atu rātou ki te taumata-porotiki e kitea ai ngā kaitono pēnei i a Kelvin Davis, a Pita Paraone, a Hone Harawira, a Marama Davidson anō hoki.
