E whā ngā tūroro hōu; ko te whakarahinga ake o nga tūroro o te wā i 'matapaetia' e ai ki Te Manatū Hauora

E whā ngā tūroro mate Korona hōu kua kitea i rō whare taratahi i Aotearoa i te rā nei, ao ake i ngā whakamārama o te wā i te Rātapu.

Kāore anō kia pākia he tūroro i te hapori.

Ngā Tūroro Hōu

6 Kohitātea

- Kotahi te tūroro i tae mai i Rūhia mā Singapore, i whakatauria i ngā whakamātautau i te rā tuatoru. E noho ana te tangata nei ki rō whare taratahi i Ōtautahi.

- Kotahi anō te tūroro i tae mai i Rūhia mā Singapore, i whakatauria i ngā whakamātautau i te rā i tae mai ia. E noho ana te tangata nei ki rō whare taratahi i Ōtautahi.

- Kotahi te tūroro i tau mai i Rūhia mā te United Arab Emirates, i whakatauria i ngā whakamātautau i te rā tuatoru. E noho ana te tangata nei ki rō whare taratahi i Ōtautahi.

Ko te tokotoru nei, nō tētahi rōpū kaumoana nō tāwāhi i rīpoatahia i te Rātapu.

E ai ki Te Manatū Hauora, tekau mā whā ngā tūroro kua kitea i tēnei rōpū: E waru nō tua rā anō; e toru ngā tūroro hōu o te wā; ā, e toru hoki ngā tūroro i te rā nei ka whakamātauria tonutia, kia tau ai mehemea he tūroro hōu, he tūroro nō tua rā anō rānei. 

9 Kohitātea

- Kotahi te tūroro i tau mai i te United Kingdom mā te United Arab Emirates, ā, i puta te hua o tana whakamātautau i te rā tuatahi. Kua haria ia ki tētahi o ngā whare taratahi i Tāmaki Makaurau.
 

Ngā Tūroro o te Wā 

E whitu tekau mā whitu ngā tūroro i Aotearoa i tēnei wā.

Ngā Momo Mate Korona

E ai ki Te Manatū Hauora, ko ngā rangahau o te wā e whakaatu ana, ko te momo B.1.1.7 i te UK he kotahi ira rima whakarau te kaha o tana pānga atu i ēra atu momo engari kaare he kitenga i tēnei wā e whakaatu ana mēnā ko te roa o te wā e pāngia ana, he rerekē ake i ērā atu momo Mate Korona, kaare hoki he whakamārama mēnā rānei ka kino kē hoki te mate.

Te piki haere o ngā tūroro

E ai ki Te Manatū, ko ngā tūroro kua kitea i ngā tatau o Aotearoa i matapaetia, i te kitenga atu, kei te piki haere tonu ngā tūroro i te ao whānui.

Ko te matapae hoki, ka rahi tonu ngā tūroro nō tua rā anō e kitea ana i ngā whare taratahi nā te nui o te hunga ka pākia, ā ka piki te ora i mua i te taenga mai ki Aotearoa. Ahakoa he iti noa ngā kitakita o te mate kei ō rātou ihu e kitea ana i ngā whakamātautau i konei, ko te whakaaro ia, ehara rātou i te tūroro kawe i te mate.

Katoa te hunga kua pākia i mua, me eke ki te taumata o te ora e tika ana i mua i te whakaaetanga a ngā kaimahi hauora kia wehe i te whare noho taratahi. Otirā, me noho tohumate kore ai i roto i te 72 hāora, i roto hoki i nga rā tekau nō te kitenga atu kua pāngia.

Nō te 1 o Kohitātea, ko te hunga i tau mai i te US, i te UK hoki, ka whakamātauria i te wā ka tau mai, ā, me noho taratahi tae noa ki te wā e kitea ana, kaare anō kia pāngia. 

Waihoki, ko tā Te Manatū kōrero, hei tēnei wiki, hei te poupoutanga o te Pōmere tīmata ai te whakamātautau i te tangata i mua i te rerenga mai ki Aotearoa, i runga anō i te whai, kia whakahekea ngā tūroro mate Korona e tae mai ana ki Aotearoa.