E tūmanako ana tētahi kāhui hapū nō Te Tai Tokerau, ka whai mana ia ki te kōkiri motuhake i o rātou ake kerēme tiriti.
I hui Te Kotahitanga o ngā Hapū o Ngāpuhi me te Minita Take Tiriti, a Chris Finlayson, ki te para huarahi hei whakatau i a rātou take.
Hei tā Pita Tipene, “He mea tino nui tēnā, kua whai whakaaro te Minita te nohotahi me mātou, kua roa nei mātou e whakaaro ana kua noho Te Kotahitanga o ngā hapū o Ngāpuhi i te koraha.”
E ai ki a Pita Tipene, ko te hiahia ā ētahi hapū, kia hoe ai te waka ki mua, kia mahue a Tūhoronuku ki muri. Hei tāna, “I roto i te hui o te Turei kua pahure nei, kahore rātou te hiahia ki te kōrero ki a Tūhoronuku ki te whakakotahi i ngā whakaaro o Ngāpuhi, mēnā e anga mua a Ngāpuhi ko te hiahia kia kōrero ki te Karauna i te tuatahi."
I tērā marama i whakamana Te Rōpū Whakamana i te Tiriti o Waitangi ngā kōrero a ētahi hāpu, kua pīrau te mana whakahaere o Tūhorohuku. E ai ki a Tipene, kua te pātōtō ake te Karauna ki o rātou kuaha.
Hei tā Tipene, “Te hanga nei kua kite ke ia kua kore tēnei kaupapa e anga whakamua ana mena ko Tūhoronuku te rōpū ko te mau i te kaupapa.”
E ai ki tētahi māngai o Minita Finlayson, he mea nui tā Tūhoronuku kōrero tahi me ngā hapū o Ngāpuhi, engari e ai Tipene kua whakaaro ngā hapū ki ngā rā ki tua.
Hei tā Tipene, "E hiahia ana ngā hapū ki te kite i ētahi kaupapa kua whakatakotongia ki te pepa ka mahi te hapū me te Karauna i runga anō i ēnei ture whakahaere."
Hei ngā marama e tū mai nei ka huitahi ai te rōpū rā ki te Karauna me Tūhoronuku ki te whai rongoā mō te whakatau i o rātou kerēme.
