Kua neke atu i te toru marama nō te matenga o te uri Māori nei a Luke Tipene. He tama ngākaunui ki te hākinakina rīki, ki ngā āhuatanga katoa o te ao Māori.
Nō nā tata nei tū ai tētahi rangi whakanui i a ia ki tana karapu rīki ki Glenora. Ki reira ikapahi ai te iwi ki te whakamānawa i a ia, otirā, ki te mātakitaki i ngā kēmu rīki i whakaritea mai.
Hei tā Mohi Allen, Ngāpuhi, "He rangi tino ataahua tēnei i te tuatahi. Ko te mea nui mō tēnei rangi, hei whakanui i tō mātau hoa, i tō mātau kurupounamu a Luke, waihoki tēnei he whakanui i ōna pūkenga katoa, anā, ko te league, te kapa haka me te pūoro."
Ehara tēnei rangi i te rangi whakamaumahara, engari he rangi hei whakarauika mai i te tini nāna rātau i whakaaweawe nōna e ora tonu ana.
E hiahia ana te whānau kia tū tēnei hui whakanui ia tau, kaua noa hei whakamahara i a Luke, engari hei whakakotahi mai i te hunga e ngākaunui ana ki te rīki.
