E whakapaetia ana ko David Hickson te tangata i kōhuru i te uri Māori a Campbell Paterson i te raki o Queensland, Ahitereiria.
I kimihia ngā toenga o Paterson kotahi wiki whai muri i tōna ngarohanga i roto i tētahi pouaka tio patata atu ki te taone o Cairns.
Koinei te tangata e whakapaetia ana nana i kōhuru a Campbell Paterson, ko David Hickson tōna ingoa, toru tekau mā rua tōna pakeke.
E whakapono ana ngā pirihimana o Queensland i mate a Paterson ki tēnei whare i roto mai o Cairns me tā rātou hiahia kia wawe ai whakaotinga i ngā mahi rangahau mo tōna kōhurutanga.
E whakapono ana ngā pirihimana kotahi noa iho te wero o te oka ka mate a Paterson.
I purua te tinana o Paterson ki roto i tētahi pouaka tio, ka hunaia ki te ngahere, toru tekau kiromita tōna tawhiti mai tēnei whare. E rua wiki i muri mai i tōna ngarohanga.
Kei te tatari tonu te whānau o Paterson, āhea hoki atu ai tā rātou tūpāpaku ki te wā kāinga i Ngāti Kahungunu, Maraenui. Koinei tētahi o ngā tama a Paterson. Nāna i tango i tētahi whakaahua inanahi hei whakanui i te taonga tapu o tōna papa, te mahi toi, he mātanga tā moko hoki.
I toro hoki ngā ringaringa o te motu whānui i runga i a Pukamata ki te whānau o Paterson e noho tonu ana ki te wā kainga, ā, ka whakapuakitia ana tamariki i a rātou whakaaro nui. E kīa ana tana tamahine, “Arohanui Pāpā, kei roto koe i ngā ringaringa o te atua ināianei.”
Ka tū ano a Hickson ki mua o te kōti teitei a te tekau mā whitu o Hakihea.
