E whakapono ana a Wiremu Flavell ka tāea e Reipa te wikitoria i te tūru o Tāmaki

Ko te Mātauranga, ko te hunga rangatahi Māori me ngā huarahi mahi ngā kaupapa matua e kawea ana e tēnei e wawata ana kia puta hei hoiho mā Reipa ki Tāmaki Makaurau a te kōwhiringa pōti matua e kainamu ana.

Ahakoa e rua tekau mā waru ōna tau, ko Wiremu Flavell te pou o te wāhanga Māori o te Kura Kāreti o Te Kōtuku, i timata ki te whakaako i te tau rua mano mā whitu, he mema i whakatūngia ki te Poari Hapori o Henderson Massey i tērā tau, a, kua tutuki i a ia he tohu pokairua mō te Mātauranga mai i te Whare Wānanga o Waikato.

Nō te Rāhina tonu ka kapi ngā tono kaitono a Reipa mō Tāmaki Makaurau, ko Wiremu Flavell rāua ko te pou o mua o te Wahanga Māori, Moana Nui a Kiwa o Te Reo Tātaki a Shane Taurima ngā ingoa i mahuta ki te pae. 

Kāhore anō kia whiriwhirihia ake, āhea ka tū te hui whakatū i te kaitono a Reipa, ēngari e mārama ana, ka puta ngā hua o te aromatawai e pā ana ki ngā mahi a Shane Taurima i a ia i Te Reo Tātāki apōpō.

Ahakoa i whakatārewangia te kowhiringa e kitea ake ko wai te hoiho mō Reipa nā ngā tūahuatanga e pā kau ake ki te kaitono a Taurima, hei ta Flavell he poto noa iho te wā kia whakatairanga, ēngari ahakoa te hoiho hei tāna ko Reipa tērā ka whiwhi te tūru o Tāmaki Makaurau.