E ai ki tētahi rangatira o Taranaki Whānui, me whakamahi ngā rawa whakataunga kokoraho hei whakawhānui i te mana ōhanga o te iwi, kaua hei whakarite ratonga toko i te ora mō ngā uri.
I whai wāhi a Neville Baker ki te tūtaki ki te minita take pūtea, ki a Bill English, i tētahi hui motuhake whai muri i te whakarewanga o te tahua pūtea i tērā wiki.
Ko ngā mananui o te ao pakihi Māori i Te Whanganui a Tara, ā ko te Pāti Māori tēnā e whakaatu atu i ngā hua i a rātou e noho ana ki te tepu.
A he hononga e kore e taea te karo, i hokona atu ngā hua o te tahua pūtea e Minita English rāua ko Minita Sharples ki te marea.
Engari e ai ki te heamana o te tarahiti o Port Nicholson Block Settlement, a Neville Baker, kei raro tonu ētahi o ōna iwi e putu ana, ā kua whakapono ia he tahua korekiko.
I tata rīhitia e Neville tetahi wāhi rongonui, arā ko te whanga o Shelly, ki tētahi kaiwhakanake. Ko te whāinga nui kia tipu ake ngā rawa o Taranaki Whānui. Engari e ai ki a ia, mēnā kāre te kawanatanga e tautoko i te iwi, auare ake.
Kāre e kore e āta tirohia ana e Neville me ēnei kaipākihi Māori ngā kōwhiringa hei te mahuru, kia mōhio ai rātou ki o rātou noho hei ngā tau e tū mai nei.
