E whakawhētai ana te whānau a Campbell Patterson mō ngā manaakitanga mai i te hāpori whānui

updated
Rev Matiu Eru - Te Matau-a-Māui

Ia rā karakia ai te minita Matiu Eru ki te taha o te whānau o Campbell Paterson. Ki tāna, e whakawhētai ana te whānau mō te nui o ngā manaakitanga kua taka mai i te hapori whānui.

E ai ki a Matiu Eru, “Tino pai rātou i tēnei wā, ko te aroha ko tana hoa i a Cluadine nē, tamaiti ātaahua, wana tamariki, pērā i a Campbell, he tangata e mōhio ki te tiaki i te tangata nē.”

Tekau mā toru ngā rā whai muri i tōna kōhurutanga, i te rā rua tekau o tēnei marama i kitea tōna tūpāpāku i roto i tētahi pouaka tio ki Cairns.

I tau ngā kōrero ki ngā āpiha mai i ngā kōrero matatapu a te hapori, nā kona, i mauheretia tētahi tangata i mōhiotia e ia, ko David Hickson tōna ingoa, ā, kāore ngā pirihimana i te kimi tangata kē.

He whakatewhatewhanga nui tēnei ki ngā āpiha o te raki o Ahitereiria, huhua ana ngā rauemi kua whakamahia e rātou, otira, katoa ngā taunakitanga i kohia ake i ngā wāhi hara e rua, otirā, kei te tatari tonu ngā pirihimana mō te kitenga ōkawa, ko wai ia, i tēnei wā, kei te aromatawaia tōna tuakiritanga e te uepu John Tonge ki Piripane.

Hei tā Matiu Eru, “Pēnei nei nā, hoki mai a te Paraire, kotahi atu ki tana kainga, te whare, te kāinga o tana hoa, kāore ki te marae.”

Kua hikina ake ngā taumaha i te whānau i tēnei wā, nā te maha o ngā pūtea i takohatia e te iwi whānui, mā te tauranga ipurangi Give a Little.

Tata ki te rima mano tāra kua kohia hei utu i ngā tīkiti ki Ahitereiria me ētahi atu nama i tēnei wā taumaha.