Good samaritan welcomes homeless into his home

He tangata kua whakapuare i tōna kainga hei whakaruruhau i te hunga kore kāinga i Tāmaki Makaurau. Ko ia tētahi o ngā tini tāngata e toro atu ana i te ringa awhina ki nga whānau e noho pōkaikaha ana ki Te Puea Marae.

I whakapūaki a Ihaka Rehu i tōna whare ki te tāwharau i ngā whānau e noho korekainga ana i te marae o Te Puea.

“I'm sitting here in my nice warm house, and there's people out there that's sleeping in their cars, just didn't feel right.  So I felt like, I've got a spare room, or a couple of rooms, and that I can go out there and help them.”

Kua hipa te kotahi wiki mai te tūwheratanga o ngā tatau o Te Puea Marae, ā, tokomaha ngā tāngata Māori mai, tauiwi mai kua tae ā tīnana atu ki te āwhina atu.

Ko tā Hurimoana Dennis, me tuku āwhina tonu mai.

“Ētehi o ngā whānau e noho i ngā whare tino nui rawa, koinā te tino tumanako ō mātou, ka wātea ētahi ngā ruma moe, e tahi, e rua, e toru, e whā.”

E rima tekau mā toru ngā whānau kua whiwhi whakaruruhau i te marae.  E whā mano tāra te rahinga o te koha pūtea. E rua ngā pātaka mātao, ka tohaina e te kamupene o Fisher & Paykel, ka mutu, mā te kamupene waea o Spark hoki e utu te nama hei whakatū i te nama kore waru rau Te Puea, ā kō kō ake nei.

“I tēnei wā te tatari ake mātou mō ētahi ngā rangatira Māori, heoi anō he hui ahau ki te taha o te Kīngi inanahi nei, otirā Rahui Papa, he tautoko ana rāua nei,” hei tā Dennis.

Kua karanga hui i te marae ka tū ki konei hei te ono karaka o te pō āpōpō ki ngā rōpū hapori, ngā kura wānanga, ngā whare karakia, me te hunga whakahaere i ngā nohonga ruma maha ki te āta kōrerorero me pēwhea rātou e āwhina ki te whakaruru mō te wā poto i ngā whānau e taetae mai ana.