Haruru ana te reo a te rangatahi i roto i ngā mahi rotarota

E pāoho ana ngā reo a ngā kōhine Māori tokowhā, he tekau mā ono tau te pakeke. I whakarongo atu a Te Kāea ki te ope rotarota o Ngā Puna o Waiorea ki Tāmaki, i mua i ngā whiringa toa Frontline ā tērā wiki.

Ko tā Te Rina Wichman-Evans (NgāPuhi, Ngāti Whātua), "Ka āhei ana au te kōrero i aku kōrero me te mōhio kei te rongo tētahi tangata i ahau. āhei ana au ki te korero ki nga kaupapa whakahirahira."

Ko te tāmitanga o te iwi Māori, ko te muru whenua, ko te oranga o te reo, ko te mana o te Tiriti anō hoki, koia ngā take kei te kōkiritia i roto i wō rātau rotarota.

Hei tā Arihia Hall (Tūwharetoa, Ngāti Tūkorehe), "Kia ako ai rātau e kuare ana ki ngā kaupapa Māori, kia ako ai he wāhanga paku e pā ana ki tō tātau nei hītori, kia ako hoki e pā ana ki tō tātau nei pēhitanga i runga i a mātau e pakanga ana kia whai oranga pai mō Ngāi Māori."

Ko tēnei te tau tuawhā o te whakataetae Rotarota Frontline nā Action Education. Kua topea ngā ope whā tekau mā whā, kia tū ngā kapa e ono ki ngā whiringa whāiti. Hei tā ngā kōhine nei ko tā rātau mahi he whakamana i te wahine Māori, i te rangatahi anō hoki.

Koia ko tā Matariki Bennet, Te Arawa, "Kua roa te wā e whakaiti te ao whānui tonu i a mātau me ō mātau reo nō reira ko tā mātau he whakapuaki i tērā reo."

He toto heke, he whakapapa rotarota tā Manaia Tuwhare-Hoani, arā, he mokopuna nā te mātanga reo Hone Tuwhare.

Hei tā Manaia Tuwhare-Hoani (NgāPuhi, Ngāti Wai), "Ka taea e au te whai i tōna huarahi, engari ka taea hoki au te whakarerekē i ngā mahi / kia tu māia au, kia te toha ai i oku nei wheako i oku nei korero pono."

Hei te rā tuatahi o te marama o Mahuru tū ai ngā whiringa toa ki te hōro o Tāmaki Makaurau.