I te horanga o ngā matapae, he pakanga tātāhau ka hua ki ngā kōwhiri matua, ueuetia katoatia ana te ao tōrangapū i ngā hua i puta.
Ka taea e Nāhinara te kāwana ko tōna kotahi, engari hei tā John Key ka toro tonu ia ki rōpū kē, ko te Pāti Māori tētahi o rātou.
Heoi ehara i te mea kei raro rawa atu te rōpū Reipa e putu ana, nā rātou ngā tūru Māori e ono o ngā tūru e whitu i kapo ake, a, he pō i raru ai Te Pāti Māori me te kaiārahi o Mana, a Hone Harawira.
Ko te wero ināianei kia whai mana nui ake ngā mema Māori i te rārangi pāti a Reipa.
Hei tā Nanaia Mahuta, “ko tāku nei ināianei, kia whakatōpūngia tā mātau rōpū Māori - kia āta whakaarohia me pēwhea.”
Ā, i te ngarotanga o ana tūru e rua, ko te manako a te Pāti Māori ka tokatū te urunga mai a Marama Fox.
Ka mutu ko taua tira anō kei te tēpu kāwanatanga, ā, ko te pātai ko wai ka whai hua i ngā kai ka horahia.
