He aituā nui ki Taranaki

Rahia Timutimu

I mate tētahi kaimahi ngahere i te ata nei ki Taranaki, hei tā WorkSafe New Zealand.

Kei ōna tau whitu tekau te kaimahi i mate, i whara i tētahi poro rākau i taka mai tētahi taraka i te wāhi mahi ki te ngahere o Te Wera.

Kāre anō kia whakaputa te ingoa o te tangata i mate, kia whakamōhio rāno tētahi o tana whānau, hei tā ngā pirihimana.

Koinei te matenga tuatahi mai te marama o Kohitātea i te tau rua mano tekau mā whā, i taua wā i whakaputaina te mema pāremata o Te Waiariki, ināianei ko te Minita Whakawhanake i ngā take Māori a Te Ururoa Flavell te kī he whakatūpatoranga te whai a ngā kamupene ngahere mo ngā āhuatanga o te noho haumaru.

Hei tāna, “Me āta tiro ki ngā ture haumaru mo nga mahi ngahere, me te āta wherawhera i ngā āhuatanga kua pupū ake i ngā tau kua taha ake.  Kia kaha hoki ngā kamupene kia kaua tēnei e hua ake ki tētahi atu.” 

Ko Robert Ruri-Erapara te kaimahi ngahere whakamutunga ki te hinga ki tana wāhi mahi, i riro tana whānau i te tahi rau toru tekau mā rima mano tāra nā tētahi kamupene poro rākau, whai muri i te whakatau i te hē ngā āhuatanga haumaru ki tana wāhi mahi.

Hei tā te Tāhūhū Rangapū o WorkSafe a Gordon MacDonald, he matenga ohorere mo tana whānau, mō āna hoa kaimahi me te whānau whānui o te hapori ngahere. He tekau ngā kaimahi ngahere i mate i te tau rua mano tekau mā toru, he kotahi i tēra tau, ā, kua tīmata te kaute o ngā nama mo te tau rua mano tekau mā rima.