He āki kia waitohutia te petihana TPP e ngā rangatahi

Ko ngā uri taiohi o Ngāti Kahungunu e āki ana ki uta rā, otirā ki ngā rangatahi huri noa i te motu whānui kia mataara mō te whakaaetanga TPP. Kei te whakahau hoki rātou i te motu kia waitohu i te petihana e karangatia ana, E Kore Mātou E Whakaae.

He māmā noa iho kia patipati i te tangata ki te tāmoko i te petihana.

Hei tā Melysa Tapiata, "Kei te hiahia mātou kia haina te motu i tēnei petihana he tono tēnei petihana ki te Kāwana Tianara kia pātai atu ki ngā tāngata o Aotearoa mēnā e whakaae e hiahia ana rānei i tēnei kirimana."

Heoi hei tā te Pirimia, ka whai hua a Ngāi Māori i te whakaaetanga.  Engari mo ēnei rangatahi Māori, ehara ko te pūtea te mea matua.

E ai ki a Mahina Huata-Harawira (Ngāti Kahungunu, Te Aupōuri), "He mea takahi te mana o Ngai Māori me te kaitiakitanga o tātou taiao e te TPPA 5.01.00 Ki te noho kuare tātou ko tō tātou mana ko tō tātou taiao ka utua ki ngā māeneene o rātou mā e noho ana ki tāwāhi."

E whakapono ana ēnei rangatahi kei te muna tonu ngā mokamoka o te kirimana nā whai anō te wairua kawa o ētahi huri noa i te motu. 

Ko tā Aroha Kingi (Rangitāne, Ngāti Kahungunu) whakahau, "Kia mataara e te iwi kei riro noa tōu mana kia hākaritia e te kāwanatanga."

Hei tēnei Taite ka tāmokohia e ngā kātipa TPP te whakaaetanga ki Tāmaki Makaurau.