He hau awhio, he ua, he waipuke ano hoki huri noa i Aotearoa

Kua tau mai te whiu a Tāwhirimātea. He āwha i tau tuatahi atu ki roto o Te Taitokerau i tēnei ata, ā, nō te rā nei ka tīmata tana karawhiu i te taiwhakarunga o Te Ika a Māui.   

E ai ki ngā matapae o Te Ratonga Tirorangi, ka kaha ake te āwhā ki ngā rohe o Te Taitokerau, o Tāmaki Makarau, o Te Tara-o-te-ika a Māui, o Te Waiariki, o Te Rāwhiti ki te raki, o Te Kāhui Maunga o Tongariro, whakarunga ki Whakatū i Te Waipounamu.

I Tāmaki Makaurau, anei ngā pikitia i pōhia ki Pukamata me te waipuke i te rohe o Te Onewa ki Mangonui. I katia te papa hopuni o Piha. I whakatahia ngā kainoho puni i te ata nei, me te matape ka patua te rohe e te taipari nui ā te pō nei. I katia te rori o Tāmaki mō te wā poto.

Ki te riu o Waikato, Ahatia te kaha o te hau me te ua, kāore i te māharahara mō te waipuke.

Ki te rohe o Pārāwai-Tikapa Moana, kotahi rau ki te kotahi rau rima tekau miromita te teitei o te ua, kotahi rau rua tekau kiromita te kaha o tāwhirimātea.

Ki Aorangi i Rangitīkei, I pōhia tētehi pikitia ki pukamata i waipuketia tētehi tiriti me tētehi tangata e hoe ana i tōna waka.

Ko ngā tohuhohu i ngā rohe katoa, kia āta whakaaro ki te mahi e tika ana, āta tirotiro i ngā rohe taimoana me ngā wai. Kaua e haere atu ā te pō, kei raru i te kaha o te āwhā. Āpōpō kē haere atu ai.

I te rā i puta atu ngā kaimahi o Te Kaunihera o Pārāwai-Tikapa Moana ki te hunga noho puni i ngā wāhi tāpotupotu kia kake ai ki te whenua hūnua. E tirotiro ana te tari Rākau Whakamarumaru ā rohe ki ngā huarere.

Hei tā te Kaiwhakahaere Rākau Whakamarumaru ā rohe he taipari nui e haere ake nei me ngā raruraru.

Te waka a Māui, Hei te pō nei rongo ai ngā rohe i Waiharakeke, i Whakatū i Waitaha anō hoki i te kaha o te āwhā tae atu ki te ahiahi āpōpō ka hāuaua noa. Hei te ahiahi āpōpō, he whatitiri hikohiko te uira ki Murihiku.