He hīkoi te hua o te whakaaetanga ki ngā mahi tirotiro hinu

Kua taka ngā nawe a ngā hapū o te Tai Tokerau ki runga taringa kōhatu i te whakaaetanga a te Kāwanatanga i ngā raihana rangahau hinu mō ngā kamupene nō tāwāhi.

Heoi nā tērā whakaaetanga, kua hua mai ko te hīkoi poroteehi.

Hei tā Reuben Taipari, "He kaupapa tēnei ehara maku ehara mōu, mā ngā tamariki ngā mokopuna tēnei kaupapa te haerenga o te hīkoi"

Kua whakawhiwhia he raihana rangahau hinu ki te kamupene o Statoil nō te whenua o Nōwei, mō ngā moana me ngā whenua o Te Reinga-Tai Tokerau, ahakoa ngā whakahē a te iwi kāinga, me te aha ko aua whakahē te pūtake o tēnei hīkoi ki Waitangi.

Hei tā Hone Harawira, "Ko tētahi o ngā tino kaupapa o te Tiriti o Waitangi ko te kaitiakitanga tērā, ko te moana tērā, ko te whenua, e tika ana kia hono ai ērā āhuaranga, ērā tino kaupapa o te tiriti ki tēnei kia hīkoi mai i Te Rerenga Wairua ki Waitangi."

Tua atu i ngā hapū o Waitangi a Ngāti Kura, Ngāti Kawa me Ngāti Rehia, kāre e kore ka tūhono atu te tini mano o ngā iwi me ngā hapū o te motu, ki te tautoko i tēnei take, ka whiu atu ai ki mua i te karauna, i te huihuinga nui o Waitangi a tērā wiki.