He hui hei whakaako i ngā tūroro Māori, Moutere hoki e pākia nei ki te mate kauti

Nā te rōpū Māori Gout Action me Ponapona Aotearoa te reo pōwhiri kia huitahi mai ngā māngai hauora, nēhi mai, tākuta mai, kairangahau mai me ērā kua roa e whakapā atu ana ki ngā whānau kua rongo i te mamae o te mate kauti.

Ko tā George Ngatai (Ponapona Aotearoa) whakamārama, "Ko te mate o te uric acid kei roto i ngā toto o a tātou whānau.  Ko tā mātou hiahia kia kōrero ki ngā whānau mō tēnei kaupapa kia taka te uric acid i roto i ngā tinana."

Hei tā te mema pāremata o Manurewa, tā Louisa Wall, "E ai ki ngā rangahau a Tony Merriman, nā te rerekē o te hanga o a tātou tinana me ērā o ngā iwi Moutere, e kore e taea te karo i te uric acid, me tōna kōhatutanga."

E mōhiotia whānuitia ana ko Ngāi Māori me ngā uri Moutere te nuinga ka pākia e tēnei mate nā te rerekē o te hanga o a tātou tinana, nā reira mā te mahi tahi ki te rangahau me te tohatoha i ngā mātauranga ka kitea he oranga.

Otirā ko te tūmanako hei te oringa o tēnei hui, ka whai māramatanga te hunga kuare ki ngā pānga o tēnei mate, ā, me pēhea te tūraki, me pēhea te manaaki.

Hei tā Miki Apiti o te Poari Hauora o Manukau Whānui, "Ko te nuinga o mātou i mau ki tērā mate i te wā i a mātou i Vietnam.  Hoinō taku mahi hei whakarongo ki a rātou kōrero, tēnā pea i runga i a rātou kōrero ka hoki aku kōrero ki aku hoa, anei ngā hunga e rangahau ana i tēnei mate."