He kaupapa angitū a East Coast Vibes mō ngā iwi o Te Tairāwhiti

E toru mano te hunga i tae atu ki te huinga o East Coast Vibes inanahi nei i ēnei rangi whakatā o Waitangi ki Tūranga nui a Kiwa.

Ko te whāinga o tēnei huihuinga kia whakanui i te kotahitanga i Te Tairāwhiti. Ko te momo waiata hei whakanui i tērā āhua, ko te reggae.

Ko te whakanui i te kotahitanga me te mana motuhake te whāinga i te huinga whakaharahara o East Coast Vibes, me te mea nei, e kaha tipu ana tōna rongonui, koia kei te haukāinga mō tā rātau taunga ki te whakatū i te kaupapa nei.

Koinei te tau tuarua kua whakahaerehia te kuapapa nei, ā, ko te whāinga kia kawe i te wairua takitahi mō ngā manu tīoriori pēnei i a Troy Kingi. He tūāhuatanga tēnei e rata ai ki a ia.

I te tau kua hori he nuku atu I te rua mano ngā tīkiti i hokona. I tēnei tau ko te manako, ka eke tērā tatau ki te toru mano, ēngari tērā tētahi korero o tea o Māori e mea ana, kia tika a mua, me tika a muri.

Kāti ake, ki te kore he whetu maiangi uri Tairāwhiti te rārangi whakangahau, kua kore e eke te huihuinga nei ki tōna ikeikenga.

Nō reira, mā hea atu i a Whenua Patuwai hei whakawai i te minenga. He tuatahitanga tēnei tūnga āna i te huinga nei. Nō ngā hāereere maha ōna huri noa i te motu whai muri i tōna ekenga ki te hōtaka o X Factor.

Nō te ōrokohanga o te whakaaro o East Coast Vibes, ko tōna momo he kaupapa humārie, ā, he kaupapa ka tū i ngā rangi whakatā o Waitangi hei tohu whakanui i te kotahitanga.