He kaupapa tiaki i te manu kiwi a Texas Rangers

Hei tiaki i te kiwi ki te Moana a Toi, he mahi mātauranga nui kei mua i ngā tauira nō Te Kura o Te Teko.

'Texas Rangers' he kaupapa i whakaterea ki Ruaihona Marae i tēnei rā, e whai wāhi ai te tauira te tiaki i te kiwi ki roto i tōna taiao.

Ka whai wāhi tēnei whakatipuranga ki te hikoi me te rapu i ngā pūkenga hei tiaki i to rātou whenua.

Ki tā te tūmuaki o Te Kura o Te Teko a Tony Holland, “Tokowaru ngā wāhanga kua whakarite mo ngā tamariki ki roto i te ngahere, ā, mo te katoa o te rā.”

Ko 'Texas Rangers', he kaupapa hōu ka whakaako i ngā tauira rua tekau ki ngā āhuatanga katoa e pā ana ki te manu kiwi kei te ngāhere o Puhikoko.

Hei tā Pounamu Paraku tētahi o ngā tauira kua tohua mai i te kura mō tēnei kaupapa “miharo te tiaki i o tātau manu kiwi mai i ngā kīrearea. Ko taku hiahia kia whai i tēnei turanga mahi kia pai ai taku tiaki i te kiwi.”

I whai parirau tēnei kaupapa nā runga i te pōari Kaitiaki Māori o Ōmataroa No2 kua neke atu i te tekau tau rātou e tiaki ana i te kiwi ki runga i o rātou ake whenua.

Ka mahi tahi rātou ki te kamupene Rayonier Matariki, ā kia hua mai ko tenei kaupapa whakaora kiwi.

Hei tā Waaka Vercoe tētahi o ngā kaitiaki o Ōmataroa No2, “Te nuinga o wā tātau tamariki, kātahi anō rātou ka kite kiwi, e whai ana i te motu. Mā tēnei whakahaere kua kotahi katoa ki roto i to rātou whenua.” 

Ka noho ngā tamariki nei ki te taha o Ian Tarei me tōna tira, ko rātou ngā kaitiaki kiwi ki Ōmataroa.

Ka hiki tēnei kaupapa hei te mutunga o te tau.