He kimi whare iti te utu pea te hua o tētahi uepū whare Māori hou

updated
Māori Housing Network no quick fix - Photo / file

E noho tūwhera ana te kuaha ki te hunga Māori e hiahia ana ki te hoko whare, nā tētahi pūtea, e toru tekau mā rima miriona tāra te nui kua tohaina e te kāwanatanga me te whakatūnga o tētahi Uepū Whare Māori.

He kimi whare iti te utu pea te hua o tētahi uepū whare Māori hou.

Heoi e ai ki tētahi kaiwhakahoahoa Māori tērā ngā wero.

E ai ki a Rau Hoskin, “He iti noa ngā mahi kua tutuki i ngā tau rua tekau, mō te taha ki ngā whare Māori nō tōna whaka-aurakitanga atu i te tari Māori, ā, e kore tātou e rūkahu me te kī he nui ngā mahi kei te haere.”

He toru tekau mā rima ira toru miriona tārā te nui o te pūtea ka haere ki te Uepu whare Māori hou, ā, ko ia tētahi o ngā tino whainga a te minita whakawhanake Māori a Te Ururoa Flavell.

Hei tā Hoskin, “E toru ngā whare ka whakatū mō te tahi miriona tāra, nō reira kotahi rau pea ngā whare ka whakatū, ā, he maramara  noa tērā.”

Kei a te Uepū whare Māori hou te mana whakahaere i te pūtea tautoko o "Kāinga Whenua Infrastructure" ka whakahaere i ngā whanaketanga i runga i ngā whenua Māori, me te "Maori Housing Fund" māna e whakatikatika, e hānga hoki i ngā whare tuawhenua.

Ki tā Hoskin, “Me ngana rātou ki te hanga whare Māori papai, me whakataeranga i ngā akoranga hoki ki waenga i ngā hapori Māori paku, me te kimi hoki i ngā tino toa o te ao whare Māori.”

Hei āpōpō ka tatū mai ngā minita Māori, pūtea hoki ki Tāmaki ki te whiriwhiri me te iwi o Ngāti Whātua.