Inānahi rā i puta te pūrongo tuatahi a Te Kāea e hāngai ana ki ngā mahi whakatewhatewha i ngā kaiwhakahāere o te kaupapa ako o 'Hei Manaaki', te kaupapa ako tūruhi Māori nā Te Whare Wānanga o Awanuiarangi.
Iaianei, kua puta te whakatau a Te Matatini me tāna e mārama ana, ko te hunga tūao o te whakataetae o Te Matatini ki Te Arawa i tērā tau, ēnā ka whai pānga ki ēnā mahi whakatewhatewha hoki.
Ko ngā ringa tūao, ngā pōu whakahaere i Te Matatini, ki te kore rātou, kua kore pea te whakataetae ā-motu.
Iaianei kua kā te rama whakawā ki runga i ētahi o aua kaitūao ao ake i ngā whakatewhanga ki roto i tētahi akoranga tāpoi Māori e whakapae ana i hipa i te tohanga pūtea mā te rima ira iwa miriona taara.
Hei tā Darrin Apanui, “Kei ia whetiwara, tētahi komiti ā-rohe ka mahi ngātahi me te Matatini engari ka noho motuhake tonu te komiti ā-rohe.”
E ai ki ngā whakamārama o Te Matatini, he waru tekau mā toru ngā mema o te hunga tūao ki te whakataetae o Te Matatini i tērā tau e whai pānga ana ki ngā mahi whakatewhatewha i ngā kaiwhakahaere o te kaupapa ako reanga whā, reanga rima nā Te Wānanga o Awanuiarangi, e kī ana ko 'Hei Manaaki'.
E ai ki a Darrin Apanui, “Tēnei tohu, he whakahau i rewaina e te kōmiti whakahaere o Te Arawa mō te Matatini ki Rotorua, ā, horekau rawa a te matarini i whai wāhi ki tētahi pūtea ki te ako i tēnei tohu.”
Tata ki te kotahi rau ngā kaimahi me ngā kaitākaro o te karapu Warriors kei waenga anō i tēnei whakatewhenga whai muri i te putanga o ngā kōrero i oti i a rātou tētahi akoranga tekau mā waru wiki te roa i roto noa i te kotahi rā. Ko tā rātou whakatau ki a Te Kāea i oti ia rātou ngā mahi i runga i te tika me te pono.
I whakapā atu a Te Kāea ki a Anaru Grant te heamana o te kōmiti whakahaere ā-rohe, anō nei a Te Arawa Kapa Charitable Trust engari horekau anō kia whakahoki kōrero mai ki a mātou mō te take nei.
