Nō muri mai i te huhua o ngā kōrero i puta mō te hāparutanga o te whakapakoko o Captain Cook i Tūranganui-a-Kiwa, e whai nei te kaupapa Tūpapa - Our Stand, Our Story kia whakatika i ngā kōrero o nehe, mā te whakakite i ngā pakiwaitara ake a ngā iwi o te rohe.
He pou whenua reo rua, he wheako matihiko, e taurite ai ngā kōrero tuku iho.
Hei tā Barney Tupara o Ngāti Oneone, “Ko te tino kaupapa ki te whakanuia ngā kōrero o neherā o ngā mātua tīpuna kātahi ka tae ngā tāngata ahakoa ko wai nō hea rānei he Māori he Pākehā ki te ako he aha te tino kōrero mō tēnei wāhi.”
Neke atu i te whitu rau tau i mua, tae atu ai te Māori ki Tūranga, arā ko tā Tupapa he whakanui i ngā mahi whakatere waka me te noho ā te Māori i ōna whenua.
Ko tā te Koromatua ko tā Meng Foon, “Ko koutou i te tuatahi mā runga Māui Tikitiki a Taranga me tana waka Nukutaimemeha tae noa ki Horouta Tākitimu Tereanini Nukutere me wērā atu waka.”
Nō te wiki kua taha ake nei tūkinotia rā te whakapakoko a Kāpene Kuki, heoi anō tā Tupapa he whakatairanga i ngā kōrero ake a ngā iwi Māori o Tūranganui a Kiwa, arā ko Rongowhakaata, ko Te Aitanga-ā-Māhaki, ko Ngāi Tāmanuhiri me Ngāti Oneone anō hoki.
Hei tā Barney Tupara, “He wāhi mō ngā mokopuna, ngā tamariki mokopuna, ki te haramai ki te whakanuia ko wai rātau ki te kōrero, ki te ako hoki mō ō rātau ō mātau hoki mātua tīpuna. Otirā he tohu anō tērā mō te mana motuhake o te iwi.
He mea tautoko nā Te Kaunihera o Tūranganui a Kiwa, me te aha, i eke a Tupapa i ngā tohu whakanui i ngā kaunihera.
Hei tā Meng Foon, “Ka taea e mātau ki te hāngai ki tēnei kaupapa hei whārikihia ngā kōrero ātaahua rawa atu nō tātau o Te Tairāwhiti.”
Ko tā Barney Tupara, “He kaupapa hou mō tēnei ao e hurihuri ana, mō ngā tamariki mokopuna hoki kua tae mai te wā.”
E āhei ana ki ngā mahi tūruhi, ka kīnakitia ana e te pūmanawa tautono, utu kore nei.
