He Kura Pō e whakahaerehia ana i Unitec ki te ako i te reo mō te koreutu

He maha ngā wānanga whakāko e aro ana ki te whakora o te reo Māori i ēnei rā, hēoi kei te marae o Te Kotahitanga kei Unitec i te Uru o Tāmaki, he Kura Pō e whakahaerehia ana e Tuatahi Pene ki te ako i te reo mō te koreutu ki ngā tauira e mahi ana ia rā, ko te nuinga he tauiwi.

He akomanga rerekē, he tauira rerekē, engari ko te whainga matua e hāngaitahi ana, arā ko te ako i te reo Māori.

E ai ki a Tuatahi Pene, “Te nuinga o ngā tauira he haere mai ana ki te kura nei kotahi noa iho te reo mā rātou, arā ko te reo Pākehā, kāre rātou i te mōhio i ngā tikanga, ngā āhuatanga o te reo Māori, heaha ngā āhuatanga o te reo Māori, na rātou anō e pīrangi ana ki te whai i tēnei huarahi o tātou.”

Kua kitea te hanga o ēnei tauira, nō ngā iwi maha.

Hei tā Pene, “Ka haere mai mai tawhiti mai tata ki te whakāko i tēnei reo, te nuinga nō Niu Tireni kē, engari no ngāi Pākehā ngētehi, ā he Māori ngētehi hoki.”

He pakeke te rahinga o ngā tauira, ā kāre e kore he tamariki anō hoki a te nuinga.

Ki tā Pene, “Te nuinga o rātou he māmā he pāpā e pīrangi ana ki te whakāko i te reo hei kīnaki i o rātou nei tamariki, tai tamariki e kuraina i roto i ngā Kura Kaupapa, i ngā Wharekura.

Otirā, nā te mea kei nohotahi, kei te akotahi ēnei tauira ki runga i te marae, i ngā pō hoki, he tūhonohononga motuhake tēnei.

E ai ki a Tuatahi Pene, “Ko te mea pai ka tāea e tātou te whāngai o ngā Kura Pō nei ki te whakāko ki ngā tauira nei arā ko te whakawhanaungatanga, ko te īngoa o tēnei marae ko Te Noho Kotahitanga arā ko ēnā ngā pukenga e pīrangi e tātou ki te whakapuare i roto i o mātou nei tauira.”