He mahi tonu tā ngā ratonga ohorere o te Tai Tokerau i muri mai i te āwha nui

Nui rawa te āwangawanga a ngā ratonga ohotata kei pokea ngā whānau e ngā mauiuitanga ina hou atu ngā waitutae ki roto i ngā waiinu.

Hei tā Annette Wynyard, he kaitinei ahi o Kawakawa, "E raruraru ana ērā momo nā reira i tae mai te Kaunihera me ō rātou wharepaku hei paku āwhina i te hunga nei i roto i o rātou kāinga anō nei ngā ipu hei mau i te rapihi mai i te kāinga."

Nō ngā rā nei anō ka patua rawatia ngā putunga wai o te takiwā nā te huringa o ngā whānau ki te whakataha i o rātou ake putanga waiinu.

He maha ngā whenua o tēnei rohe kei raro tonu i te wai engari ehara i te mea ko ngā kaipāmu anake kua patua e tēnei āwha nā reira e tatari mai ana te iwi kia rongo he aha ngā āwhinatanga a te Kāwanatanga mō Te Tai Tokerau.

Hei ngā rā nei ka whakawāriutia e te Kāwanatanga ko ngā mahi a Tāwhirimātea ki te whenua me ngā iwi mai Tāmaki ki raro engari mō tēnei wā kei te haere tonu ngā mahi a ngā ratonga ohotata ki te whakautu i ngā ahuatanga katoa kua hua ake i te āwha.