He mahi tōrangapū pea te pūtake o ngā whakahē ki te kura hourua ki Whangaruru

He mahi tōrangapū kē te pūtake o ngā whakahē o te wā ki te kura hourua ki Whangaruru, otirā ki te kaupapa whānui o ngā kura hourua. Koinei kē te kōrero a te tūmuaki o taua kura i tono motuhake mai ki a mātou o Te Kāea, kia haere atu ki te kōrero ki a ia i te rā nei. 

He kura hou i tuwhera ai ngā tatau i ngā marama tata nei.  E mea ana te tumuaki ehara i te mea tupono noa ka pokea rātou e ngā kōrero whakaparahako i mua atu i te kōwhiringa pōti o ngā rā tata.

E ai ki te tumuaki, a Natasha Sadlier, “Hei reira katoa ētahi taimahatanga niho me kī hei timatatanga, engari ehara i te mea i tiro haere tātou ki ēra taimahatanga me te waiho noa i tino pukumahi mātou ki te whakatika ki te whakapai haere ēra o ngā taimahatanga.”

He kura tēnei i whakaturia hei hapai ake i te matauranga o ngā rangatahi kahore e eke ana ki roto i ngā kura auraki.  Nareira ehara i te mea e whai wahi ana ngā kaiako ki te āwangawanga mō nga kōrero o waho.

Hei tā Natasha Sadlier, “Mahi motopaika ana rātou mahi hoiho ana rātou kei roto i te ngā karaehe ra etahi  o ngā tamariki kaa mahi mana moana ana rātou e whakaako ana rātou me pēhea te taraiwa pōti kei roto i tera atu o ngā whare ko ngā tamariki e mahi kapa haka ana.hei reira katoa ngā akoranga.

E kore hoki e mutu ngā akomanga o tēnei kura hourua ki te kuaha o te ruma ako engari ka puta atu ki ngā mahi katoa a ngā matua tūpuna i te taiao whānui. I tēnei wā hoki, no te haukainga te nuinga o ngā tauira e whā tekau mā iwa.  Ko ētahi anō ētahi kei te haere mai ia rā i Whangarei rā anō kia kurangia rātou ki konei.

E ai ki a Natasha Sadlier, “A rātou mahi katoa ka hou atu ki roto i ngā tiwhikete mo te NCEA ā tū atu i tēra e ako ana rātou a tinana nei e hara i te mea mai i te pukapuka noa engari mā te mahi, mā te mahi a ngā ringa a te tinana a te hinengaro kua ea tēra taha.”

Ko te whainga kia piki ki te whitu tekau ngā tauira o tēnei kura hei te tau e tū mai nei.