He omanga tata te haere ake nei mō te tūru o te rohe o Te Tai Hauāuru

I tatū i te kaitono Pāti Māori mō Te Tai Hauāuru a Chris McKenzie tōna hīkoitanga me te iwi o Pouākani Marae, Mangakino.

Ki ngā tatau pōti o Whakaata Māori koia kei mua i te kaitono a Reipa a Adrian Rurawhe e toru ōrau, he oma tata te haere ake nei.

He hū nui hei whakakī mā McKenzie e ai ki te iwi o Pouakani Marae, Mangakino. 

Ko te wero kei mua i a ia ko te pupuri tonu i te tūru mō te Pāti Māori, tērā kua roa e puritia ana e Tariana Turia me te whakaaro nui kia mau tonu te aro ki roto o te Whare Pāremata.

Hei tā Leanne Karauna, “Kei te tautoko te mahi o Tariana ia wā, ia wā, koia ka hara mai ki konei, ka hoki mai ki konei, ia wā, ia wā ka tautoko te whānau o Mangakino.” 

Ka mutu, kahore ōna māharahara, ka taea e ia.

E mea ana a McKenzie, “Kua noho au ki te taha o Whaea Tariana mo ngā tau e toru, mo ngā tau tekau, ā, mōhio pai au ki ngā kaupapa o tō tātau nei pāti.”

Ki ngā whakatau a Whakaata Māori mō Te Tai Hauāuru, toru tekau mā rua paihēneti o ngā pōti i tohu i a McKenzie, whai tata ana ko Rurawhe o Reipā mā ngā paihēneti rua tekau mā iwa.

E ai ki a Rurawhe, "Ono marama ki muri i reira ngā whakaritenga, nō reira harikoa ahau kua tutuki ia wāhanga.”

Ko te rohe whānui o Te Tai Hauāuru ka rere mai te tonga o Waikato, ki te rohe pōtae, Taranaki ki Manawatū me Whānganui, ko te tūkino whānau te kaupapa matua mō ngā iwi kei te rohe, i ngā wā o mua ko Reipa i kapo i te pōti ā-rōpū.

Māia ana a Rurawhe i a ia e hikoi ana i ōnā haora whakamutunga mo te pōtitanga ki tōna kainga o Whanganui.

E kī ana a Rurawhe, “Ka nui te mihi ki ia kaitono mo Te Tai Hauāuru, he whakataetae pai tēnei, i runga i te ngākau whakaiti e patua te kaupapa kāua ko te tangata.”

Ko ētahi atu e whai ana i Te Tai Hauāuru ko Jack McDonald o ngā Kākāriki me Jordan Winiata mō MANA.