E hīrere tonu ana ngā mihi mō Jerry Collins rāua ko tōna hoa rangatira a Alana, i mate i te Rāmere i tētahi aituā tuki waka i Wīwī.
I whakanuia te toa whutupōro e ōna kaiwhaiwhai i tētahi hīkoi mārie mā ngā rori o Narbonne.
Mai Porirua ki Wīwī, he wā whakamahara nā ngā tīma whutupōro me te hunga tautoko ki te Ōpango ō-mua a Jerry Collins. Tata ki te kotahi mano rima rau tāngata i tae atu ki te huihuinga tuku aroha ki a Collins me tōna hoa wahine i te taone o Narbonne i Wīwī.
I noho tahi a Alama Ieremia, kaitākaro ō-mua o ngā Hurricanes me te kapa Ōpango, kaiwhakahaere o Hāmoa, ki te taha o ngā mātua o Collins.
He whārangi pukamata kua whakaritea hei whakaīngoa i te ara tuaono o Westpac Stadium, ko te ara o Jerry Collins, ā, neke atu i te rima mano ngā tāngata e whai ana i te whārangi whakaīngoa i te Papa Tākaro o Porirua ko Jerry Collins Memorial Park.
Neke atu i te rua tekau mano tara kua kohikohia ki te whārangi "Givealittle" mō tāna pēpi, mō Ayla.
