Ki Te Taitokerau, he pōtitanga motuhake kei te haere ki Whangarei nā te makeretanga mai o tētahi kaikaunihera i te kitenga atu, ehara ia i te kirirarau ki Aotearoa nei. He tuatahitanga hoki tēnei āhuatanga mai anō, i roto i ngā pōtitanga.
E kaute ana nga ra ki te kapinga o te wā mō ngā kaitono mō te tūranga e wātea ana ki runga i te kaunihera o Whangarei.
I makere mai a Jayne Golightly i te tūranga kaikaunihera mō Denby i tērā marama, nō te kitenga ake ahakoa kua rehita hei kaipōti horekau kē tana raraunga ki tēnei whenua.
Ko tā Dale Ossoske o Te Ratonga Pōti, kahore anō he kaitono kotahi kia rehita noa hei whakataetae mō te tūranga kaikaunihera o Denby. Heoi anō, nō tēnei rā tonu ka mau ake i a Te Kāea tētahi o ngāi taua kei te whiu i tana potae ki te poringi.
Hei tā Huhana Lyndon, "Horekau ngā hapori pera ia Denby i whai pūtea mai i te kaunihera mō te whakahiki ake i tō tātou hapori pērā i ētahi atu o ngā takiwa. Ki au horekau he papa tākaro pai ki roto i te hapori ngā whare iti mō te marea. Ki au, i kite au ētahi o ngā papa tākaro e taka ana i roto i te paruparu nō reira āe, koirā tētahi o ngā tino raru me whai māngai te hapori ki te kaunihera."
Ko ngā hapori katoa o Otangarei, Tikipunga, Kamo me Whau Valley katoa kei roto i te peka pōti o Denby. Nā, e whakaneinei atu ana te kahurangi o Whangarei ki te kainoho hōu o tēnei tūranga.
Hei te poupoutanga o te Wenerei e haere mai nei hiki ai te wahanga tono mō tēnei tūranga.
