He poutoko whiringa kōrero mō te ao wairua, kua ngaro nei

Te Kuru o te Marama Dewes

Kua tanuku te tihi o Panekire, kua waipuketia te moana o Waikare i te roimata, nō te rironga o te māreikura, o Tākuta Rangimarie Turuki Arikirangi Rose Pere, e waru tekau mā toru tau te pakeke. 

Nō inanahi nei te uri o Ngāi Tūhoe, o Ngāti Ruapani me Ngāti Kahungunu ka mate i tōna kāinga i Waikaremoana. 

Hei tā Te Hira Pere, "Kei te pōuri te ngākau o te whānau, engari i mōhio mai mātau, kei a ia, kei tētahi taumata hōu pea ki tua o te ārai."

Me te mahara ake anō o tēnei o ana mokopuna, kei te noho pani te ao whānui i tōna rironga. 

"He kuia rongonui, he kuia kaha ki te whakatutuki i te whakaaro kotahi, ahakoa ko wai ahakoa nō hea te tangata … ko te ngākau māhaki ki te tangata, ahakoa te tangata. Koirā te tino taonga nei i homaitia ki a au.”

Ko tā Ngahiwi Tomoana, "He rongonui a ia i roto i te ao wairua, te ao mahere, nō Īhipa, Haina me ērā atu o ngā iwi o Amerika ki te Tonga. Ia rā, ia rā ka kōrero ia ki a rātau i runga ērā āhuatanga mō te ao wairua … i kawea mai mātau i tēnei ao ki tērā ao i ngā wā katoa, i ngā wā katoa."

Rere ake ana tōna wairua, mahue mai nei ko ngā whakaakoranga. 

Hei te pō nei takoto ai te kuia nei ki Whākirangi marae ki Te Wairoa, hei āpōpō whakawhiti atu tōna tūpāpaku ki Tākitimu marae tangi ai. Hei te Wenerei, kawea atu ai ki te marae o Te Rongopai i Pātūtahi ki reira takoto ai. 

Hei te Tāite, hei te tekau mā tahi karaka tīmata ai te karakia whakamutunga.