He pukapuka hōu e whākī ana i ngā mahi huna o te ao tōrangapū

E rere ana ngā wero ā-ture i te tī me te tā o te papa tōrangapū, ao ake i te whakapuakitanga o ētahi whakapae mōrikarika i roto i te pukapuka "Dirty Politics" a te kairipoata whakatewhatewha, a Nicky Hager. E hāngai ana ngā whakapae ki te Kāwanatanga o John Key, ki āna kaimahi, ki ētahi o te tira tautoko hoki o Nāhinara.

Ko Nicky Hager te kairīpoata whakatewhatewha nāna te pukapuka Dirty Politics i tuhi.

He pukapuka, hei tāna, e whakaatu ana i te taha o John Key me tana kāwanatanga kāre e kitea ana e te motu.

Ko tētahi o ērā e whakapaetia ana i rongo i te weriweri o ēnā tūmahi ko Len Brown, koromatua o Tāmaki Makaurau, me tana moe puremu.

I ahu mai ngā whakamahuki o roto i te pukapuka a Nicky Hager i ētahi pārongo manomano nei i tāhaetia e tētahi tangata mata kore, mai i te tangata nei a Cameron Slater, kaituhi o te whārangi ipurangi, o Whale Oil.

I tētahi wahanga o te pukapuka kei te pahupahu a Cameron Slater ki a Judith Collins, Minita Take Pirihimana i taua wā, mona e whiwhi nei pea ki tētahi whitiahua i tētahi pūtake pirihimana e hāngai ana ki te kēhi urutomo ki Ruātoki.

Kua whakatakoto amuamu ōkawa te Rōpū Kākāriki ki ngā pirihimana me ētahi atu mo ngā whakapae, me te karanga kia whakatārewatia a Collins i tana tūranga minita.

Kāti, kei te tū māro a John Key i runga i tēnei take, me te kī ake ko te taha mauī kē te hunga whakararu.

Tūturu, kua tahuri a Key i te pū o whakapae ki a Nicky Hager, engari, tē whai kiko tēna mahi āna.