I hoki a Shannon McIlroy ki te papa kakariki ki Broadbeach Bowls Club ki te Tai Koura i te rangi nei e hiahia ana ki te tōtika i tōna waka whai muri i tōna hingatanga inanahi.
Ko tōna hoariri i te rauna tuarima o te whakataetae takitahi tāne ko Krishna Xalxo ō Īnia. I puta te ihu o McIlroy 21-0.
Hei āpōpō hoki anō ai a McIlroy ki te papa kakariki ki te tūtaki ki tētahi hoariri, kāore kia whakaingoatia mo te whiringa whānui.
I hoki anō te tokorua wāhine poipātū, arā a Joelle King me Amanda Landers-Murphy ki te kōti i te rangi nei.
I tuki rāua ki te tokorua nō Ahitereiria, ki a Sarah Caldwell me Christine Nunn. I te kimi i a King me Landers-Murphy i tō rāua wikitōria tuatahi. Ā i tutuki tērā whāinga, e 2-0.
Nō muri tata atu i hoki anō a King ki te kōti, ki te taha o Paul Coll i te whakataetae hanumi. I hinga i a ratou tētahi tokorua nō te whenua o Malta 2-0.
Ki te taiwhanga mekemeke, i tuki rae ki te rae te kaimekemeke o Ngāti Porou, Ngāpuhi me Tainui, o Tasmyn Benney kia Kristina O'Hara o Airani ki te Raki i te whiringa whāiti o te wehenga wāhine 45-48kg. Ahakoa kāore te ihu o benney i puta i riro tonu e ia te mētara rauwhero. He tikanga motuhake ki te ao mekemeke i ngā Taumāhekeheke Hoawhenua, arā ka kore he whawhai tuturu mō te mētara rauwhero, ka riro kē e ngā marurenga o ngā whiringa whāiti te mētara rauwhero.
