He tama nō Te Arawa e whai nei i ngā mātauranga taiao i Iceland

-Nā Waimanea Nuri, pia o Te Rito

E ono ngā tāngata Māori e ū kaha ana ki ngā mātauranga mahi taiao, kua maringa nui ki te haere ki te kura o Energy Field, te kura pūngao o Iceland me Te Whare Wānanga o Reykjavik.

E ai ki te Hoematua o te poari whakahaere, e ai ki a Tess Kora, he kaupapa tēnei e whakawhanake ai i ngā mōhiotanga o ngā rangatira o āpōpō. 

“Ko tā te pōari whakahaere, he āwhina i ngā rangatahi o te wā ki te ū ki ngā mahi e hāpai ake ai i a Aotearoa.”

E ai ki te tauira o Rūaumoko, ki a Haukapuanui Vercoe, he toitoi manawa nōna ki ēnei mahi, ki ēnei akoranga nā te tino kite i te kino o te whenua me te taiao o Aotearoa. 

“Ko taku tino hiahia he whakahoki mai i ngā tūāhuatanga hōu e whakawhanake ai i tō tātou whenua taurikura”.

Ko tā Vercoe hiahia, he whakapuaki i ōna wawata mo te anamata o tōna kāinga, me te akiaki i ērā o ngā taiohi e pīrangi ana ki te mahi i ēnei mahi. 

“Me ū ki āu ake whāinga, ā, me he hiahia anō te hunga ki te whakapai i a Aotearoa, me ū ka tika ki te mahi.”

E ai ki tana tāina, ki a Sonny, tauira anō o te kaupapa, kei te kōingo te ngākau ki te hanga mahere mō tētahi ao hou. Ko tāna e wawata nei, he ū ki te whakawhanake i te ao o te whare hiko ngāwhā hei painga mā ngā iwi o te motu. 

“E ū ana au ki ōku wawata mō ngā mātauranga o tuawhenua, hei painga mō tōku whānau, hapū, iwi.”

E ai anō ki a ia, he hirahira anō tēnei kaupapa, he ara e taea ana e te hunga ngā mātauranga e tika ana te hauhake.

“He akoranga tēnei mō te anamata o Aotearoa whānui, nā te kaha o ngā ngāwhā i ngā rohe (e) maha o tēnei whenua.” 

Ka tae atu te tokoono ki Iceland hei te Rāhoroi, ā, ka ū ki ngā mahi hei te Rāhina 18 o Hūrae ki te 5 o Ākuhata 2022.