He tangata i mate i tētahi hauata waka ki Te Taitokerau

Tokowhā ngā tāngata i mate, ā, kotahi te tamaiti i whara kino nei whai muri i te tukinga o tētahi motuka ki tētahi taraka kawe pororākau i Uretiti i te uru o Waipu.

Hei tā te hunga pirihimana, "e matapaetia ana i te huri te motuka, kātahi ia ka tuki ki te taraka." Kei reira tonu te hunga pirihimana e āta tewhatewha ana i te aitua nei, ā, kāore anō kia puta te tuakiri o ērā i mate"

E matapaetia ana ka kati ngā huarahi mō ētahi haora, me te aha, ka tukua ngā motuka kia para i huarahi kē, kia mātaihia te wāhi aitua e ngā pirihimana.

Hei tā te kaimātai pirihimana a Murray Hodson, "kātahi te takerehaia nui ko tēnei. E tuku nei i te aroha ki ngā whānau o ērā i mate i tēnei wā o te tau hou, o te harinui."

Hei tāna anō, e kore e mutu tāna āki i te tangata kia haumaru te haere i runga i ngā huarahi puta noa. "

Ata haere. E hiahia ana mātau kia tae pai koutou ki ō koutou wāhi, ā, kāre te hunga pirihimana e hiahia kia tae atu anō ki tētahi aitua waka pēnei i tēnei. Kāre hoki mātau e hiahia kia whāki atu ki whānau kē, kua mate ō rātau whānau i runga i te huarahi i tēnei wā o te harinui".