He tatau ōrite mā ngā Mystics me te kapa Magic

updated Wikitōria Day

Kātahi te kēmu kauanuanu ko tērā ki waenganui i te kapa Mystics me te tira Magic ki Rotorua. I muri kē a Mystics e haere ana mā te iwa piro i te hauwhā whakamutunga, nā wai rā, ka koke whakamua rātau kia orite ai ngā tatauranga i te mutunga iho. 

I tino whanake a Magic, whai muri i tā rātau hinganga ki te tira Central Pulse i tērā wiki. 

He koke te mahi a te tira manuhiri  i te hauwhā tuarua, heoi, nā te hiakai nui o Magic, i whakairihia e rātau ngā piro e waru ki te rārangi tatau.

He rua tekau mā waru ki te rua tekau mā tahi te kāute i te wehengarua, ā, i pūhake katoa te taiwhanga i ngā hūrō a ngā kaitautoko. 

Ko te kapa Mystics te kapa toa i te hauwhā tuatoru, heoi, e whā miniti i mua i te tānga manawa i hinga a Catherine Latu, he wharanga raparapa te take. 

I pupū ake te āmaimai ki waenganui i ngā kapa e rua, ā, ko ngā hapa te otinga atu.

Heoi, i piki anō te kaha ki a Mystics, nā konā, ka āwangawanga te kapa nō Waikato.

Ko Maria Tutaia te tino whetū o te kēmu. I tutuki i a ia ngā piro e toru, me tētahi piro hāmene i mua tata mai i te mutunga.

He whā tekau mā rima ki te whā tekau mā rima te hua whakamutunga.