He taunakitanga hōu kua hua mō ngā raru kei Te Rōpū Taurima o Manukau

updated

Inanahi nei, i pōwhiritia te Manatū Hauora me tā rātou mahi arotake e Te Rōpū Taurima.  Heoi, i te rā nei, he taunakitanga hōu kua hua eke.

Hei tērā wiki, ka tīmata a PricewaterhouseCoopers ki te tirotiro hōmiro atu ki ngā pukapuka tahua a Te Rōpū Taurima o Manukau.

He karanga tēnei nā Te Manatū Hauora, whai muri i te rewanga ake o ētahi heitara tinihanga pūtea. Ināianei, he taunakitanga hōu kua hua ake e tohu ana, i tae tuatahi atu ngā heitara ki te Manatu Hauora, e ono marama kē ki muri. 

Hei tā Te Manatū, i te marama o Hakihea rua mano tekau mā toru i whai wāhi a 'Fraud Hotline' ki tētahi karere e meatia ana i te whakapae, i whai pānga tētahi kaimahi o Te Rōpū Taurima ki ētahi mahi whakapau pūtea horekau e tika ana.  Heoi, kīhai ēnei kōrero i tae ki ngā kai-ōtita nā rātou te mahi arotake i ngā penapena pūtea a Te Rōpū Taurima.

Atu i tēnā, kua puta hoki i Te Pukenga Here Tikanga Mahi, te rāngai e whakamarumaru ana i te koni atu i te whā rau ono tekau kaimahi kei Te Rōpū Taurima,
Kia makere mai te tumu whakarae o te kamupene i tana tūranga, whai muri i te hekenga mai o te heamana a te poari i te tīmatanga o te wiki nei.

Hei tā Richard Wagstaff (PSA), "...kāore anō te Tumu Whakarae e whakatutuki i āna haepapa e hāngai ana ki tēnei raru.  He hiahia tō ngā kaimahi kia mōhio he aha te aha, he pātai ā rātou, he pātai ā mātou, kīhai te ūpoko rā e whakahoki kōrero mai."

Heoi anō rā, e koke tonu ana ngā mahi a Te Manatū.

Ka tīmata tūturu te arotake a PricewaterhouseCoopers i Te Rōpū Taurima hei te Rāhina e tū mai nei.