He tautohetohe motuhake i hua ake i te Whare Pāremata mō Whānau Ora

He tautohetohe motuhake i haere ake i te Whare Pāremata mō Whānau Ora, ao ake i te whakapuakanga o te pūrongo arotake a te Otita Matua.

Āpiti atu e karanga ana te Rōpū Reipa kia arotakengia ngā ratonga Whānau Ora me Te Puni Kōkiri mō te taha ki ā rātou whakapaunga pūtea.

E ai ki ngā whika mō Whānau Ora o tana tahua kotahi rau toru tekau mā waru miriona, he whā tekau mā rua miriona i whakapaua ki ngā mahi whakariterite.

Ko ēnā pūtea te aro a Reipa me tana aki kia āta arotakengia ēnā whakapaunga.  He tautohetohe motuhake mō Whānau Ora.

I te wāhanga tuku pātai i mate te Pirimia ki te whakautu i ngā whiu a te apitihana.

Ā, ko aua auau anō rā i a Winston Peters.

E ai ki a Reipa me arotake ngā ratonga Whānau Ora me Te Puni Kōkiri, mātua rā te whā tekau mā rua miriona mō ngā mahi whakariterite.

E ai ki a Te Ururoa Flavell, “Kua āta tirohia te whakapaunga o te moni i roto i te kōmiti Māori nā o konie o te Whare Pāremata nei nō reira kāore he take o tērā momo whiu, o tērā momo kōrero ki au.”

E ai ki te heamana o te Komihana Whānau Ora mō Te Ika-a-Māui, kua rongo rātou i ngā tohutohu o te pūrongo, ā, ka whakatīnanatia ā haere ake nei.

E ai ki a Nanaia Mahuta, “Me tono atu ki ēnei rōpū komihana klia haramai ki tā mātou kōmiti Māori ki te pātai i ngā pātai ki a rātou, arā, ka pēwhea a rātou mahere hei tutuki i ngā hiahia o tēnei kaupapa o te Whānau Ora.”

Kāti i te mutunga iho katoa ngā rōpū, haunga i a Aotearoa Tuatahi, e whakaae ana me ora tonu a Whānau Ora.