He tīmatanga pai ki Dubai mō ngā Ōpango me ngā Mamaku takiwhitu

Nā tēnei oma a Stacey Waaka te piro tuatahi ki Ngā Mamaku (Whakaahua: Mike Lee - KLC fotos for World Rugby)

I ngā hekona tuatahi noa, hikaia ai te tīmatatanga o te tau tākaro o Ngā Mamaku, i te tauwhāinga whakatuwhera i te World Sevens Series i Dubai.  

Ko te whana tuatahi nā te kāpene hōu, nā Tyla Nathan-Wong i te tukinga ki a Hapani i kotahi atu ki ngā ringaringa o Stacey Waaka, i oma tika atu ki te pae piro.

Nā Theresa Fitzpatrick, Shakira Baker rātou ko Waaka anō hoki ngā piro kia 29-0 ngā tatau i te wehengarua. Kihae i māmā ake i muri i te whakatā, e rua ngā piro nā Huia Harding, kotahi ki a Alena Saili hoki kia toa, e 48-0.

I hanga māmā hoki te toahanga a ngā tāne ki runga ake o Wērā i te ahiahi. 

I rite ki ngā wāhine, i kaha i te tīmatanga. I puta te ihu i te piro nā Tone Ng Shiu, ā kaare pea i pau te kotahi miniti, i whakawhiti atu hoki a Kurt Baker, kia 17-0 ngā tatau i te wehenga. Pau ana te 30 hekona i te haurua tuarua, ka piro anō a Ng Shui, ā i whai atu hoki, ko Ngarohi McGarvey-Black kia 36-0 ngā tatau i mua i tētahi piro ki a Wērā, nā Joe Goodchild.

I toa hoki ngā wāhine o Ahitereiria, ka turaki i a Whītī e 38-0, ā i eke panuku te kapa o Amerika ki runga ake o Brazil, o Wiwī ki runga ake o Ingarangi.

Nā te whakaritenga hōu kia toru ngā rā te roa, koina anahe ngā tūkinga a ngā kapa katoa, he taonga i te mōhiotanga atu, i tata ki te toru tekau te taumata pāmahana ki reira. Kua whakahōungia ngā whakataetae World Sevens Series kia nui ake te whai wāhi o ngā kapa tāne, wāhine hoki, ā ko Kirikiriroa ka pērā hei te paunga o Kohitātea.