Kei te tuki te kapa tuarima o te whakataetae, ara ki ngā Chiefs ki ngā Hurricanes e noho nei ki te turanga tuawha. Ehara noa i tētahi pakanga o ngā kiritata.
Me puta te ihu o ngā Chiefs mā te 23 kaute e peke ai rātou i ngā Hurricanes i te rārangi whakataetae. Ki te pērā mā ratou te whiringa whānui e whakauhi hei te wiki ka whai atu. Te āhua nei ka tuki anō ngā kapa i taua kēmu.
Hēoi, kāore a Colin Cooper, kaiako o ngā Chiefs e whakaaro pērā ana. Hei tāna, ko te wikitōria te aronga nui.
He mea whakaae e Jason Holland, kaiako tuarua o te kapa Hurricanes, he kēmu noa iho pērā ki ngā kēmu katoa, ko te turaki i ngā Chiefs te whāinga matua.
Ko tētahi atu whāinga o Cooper kia whakanui i āna kaitākaro e wehe ana hei te tau nei, i tēnei tō rātou kēmu whakamutunga i Kirikiriroa, pēnei i te ika-ā-whiro i a Liam Messam.
Hei tā Holland anō, he hiahia nō rātou i te Whanganui-ā-Tara kia tākaro anō ki te wā kainga.
E whakaae ana ngā kaiako e rua nei he pakanga kei te haere, me kaupare i tētahi atu e puta ai te ihu.
Hei tā Te Toiroa Tahuriōrangi, ko te kapa e rere ana i te au moana tērā ka angitū. Ā, ko ngā Chiefs tērā i tēnei wā. Kua kōtahi noa ngā wikitōria o ngā Hurricanes i ngā kēmu e toru kua pāhure. Ko te tauaro ō tērā ko ngā Chiefs, e aru nei i tō rātou wikitōria tuatoru karapīpiti.
