He tokorua kua eke ki ngā taumata ki ngā Tohu Hakinakina Māori

Wikitōria Day

I eke anō ki taua wā o te tau e whakanuia ai ō tātau toki kaitākaro i te pō tuku taonga hākinakina Māori i tū ināpō.

He kanohi hou i puta whakaihu waka mai ai, heoi, ko te tino wāhanga o te pō ko te whakawhiwhinga o te tohu kaitākaro o te tau ki tētahi pāpā me tana tamaiti.

He tuatahitanga tēnei kia riro i tētahi tokorua te tohu kotahi.

Ko te tohu kaiwhakahaere hākinakina o te tau te tohu tuatahi o te pō, ā, i tēnei tau, tokorua ngā kaiwhiwhi. Ko Trina Tāmati nō NRL Auckland Nines, rāua ko te kaihautū o Iron Māori, a Heather Skipworth.

I riro i a Glen Jackson te taonga mō te kaiwawao o te tau. Kāre ia i whai wāhi mai ki te pō whakanui nei engari i whakamīhia tonutia ia mō āna mahi i te whakataetae Super Rugby, ITM Cup hoki.

He kanohi hou i whakawhiwhia ki te tohu kaitākaro Māori haua o te tau, arā, ko te kaieke pahikara, ko Emma Foy.

Ko Stacey Jones rāua ko Phillip Tataurangi ērā i whakaingoatia ki te hōro rongonui mō tā rātu mahi ihu oneone i roto i ngā tau.

Ko te kapa Opango Māori te tira i riro i te tohu Kapa Hākinakina Māori o te Tau. Nō te tīmatanga o tēnei marama tonu nei whakahinga ai rātau i a Hapāna.

Huri ake ki te tohu o te reo o te parawhakawai. Nō mātau o Te Kāea te māngari nui, inā rā i whakawhiwhia ki tā mātau karere hākinakina, ki a Rewa Harriman tēnei taonga mō āna mahi  nōna i Hapāna mō te haerenga motuhake a te kapa Opango Māori.

I riro anō i a Stacey Jones tētahi tohu, arā te tohu mō te kaiako hākinakina o te tau.

I whakarārangi ake ō tātau toki kaitākaro o te ao ki te atamira. Ki reira whakanuia ai ā rātau whakatutukitanga nui i tēnei tau.

Ki ngā tohu mātuatua o te pō. I riro i a Tyla Nathan Wong, te toa whutupōro takiwhitu, te taonga kaitākaro kōhine o te tau mō te wā tuarua.

Ko te autāia poitūkohu nei nō Ngāti Maniapoto me Ngāpuhi a Tai Wynyard te toa o te tohu Kaitākaro tamatāne o te tau. He tuatahitanga tēnei mōna.     

He kanohi hou ano i hua mai ai hei toa o te taonga Kaitākaro Wāhine Māori o te tau. Ko te kaihoe o Aotearoa a Fiona Bourke.

Kāre i tua atu i te kaitope rākau, i a Jason Wynyard, hei kaiwhiwhi i te tohu Kaitākaro Tāne Māori o te tau. He hōnore kua tau anō ki runga ki a ia.

I whanga mai te iwi kia rongo ko wai te toa o te tino tohu o te pō, arā, ko te taonga kaitākaro māori o te tau.

I hūrō katoa mai te whare i te whakahuatanga mai o ngā ingoa o Jason rāua ko Tai Wynyard. Ka tika rā kia riro i tēnei tokorua ngākau iti tēnei taonga nui.