He topenga tāke pea ka noho hei kaupapa mā Nahinara hei tēnei kōwhiringa pōti

E ai ki te Pirīmia ki a John Key he topenga tāke pea ka whai wāhi atu ki nga kaupapa here a Nahinara i a ratou e whakataetae atu ana ki te kōwhiringa pōti ā motu.

Hei tāna, ko te hunga whai utu wawaenga tērā e tika ana kia riro topenga tāke, he āhuatanga hei tāna ka taea pea ao ake i te tahua pūtea tūwhene ka whakapuakitia āpōpō.

Ka tika ra he tahua pūtea tūwhene te kitea ake āpōpō, ā, ko te karanga a te apitihana kia riro mā te hunga rawakore ngā hua o tēnā e hauhake. Engari, e ngutu kukū ana a Bill English i te rangi nei, otirā, te āhua nei ka noho kē tēnā tūwhena hei hua whakararata mā Nāhinara i te hunga pōti.

I riro te tahua pūtea hei kai mā tēnei mīhini tā, ka mutu, ko te para rapihi te otinga. He tohu pea e wawatatia ana e te Minita ka kore e tāruatia āpōpō.

Tāturu kua rongo ngā kaimahi kāwanatanga i te kikini o te tātua, e mōmona ai te tahua pūtea. Tērā tērā, ko te hiahia o te apitihana kia taka iho ngā painga o tēnā tahua tūwhene ki te hunga rawakore e pēhi nei e te koremahi me nga utunga iti.   

Kāti e ai ki te Pirimia me anga kē pea te pūtea hōu ki te topenga tāke mā te hunga utu wawaenga, he kaupapa e whakaarotia ana e Nāhinara hei kawenga mōna ki te kōwhiringa pōti. 

Nō reira e ai ki te kōrero - ahakoa he iti he pounamu - engari hei āpōpō tātou ka kite pēnā e tika ana tēnā mō te tahua tūwhene he pahupahu noa rānei.