Ko te hunga puku mahi te hiahia ki Rotorua engari mo ētahi o ngā pakihi kei te rongo i ngā uauatanga mo te whakakī i ngā tūranga mahi kei te wātea. Mo te whare-kai Māori o Kai Café Aye ko te tohu i te tangata tōtika mo te mahi te whakaaro nui.
Nō te marama o Hui Tangarū i whakatūwheratia e tēnei pakihi Māori i ōna kūaha, tokowha ngā kaimahi kei raro i a rātou. Ki tā Charlene Whakatau kaiwhakahaere o Kai Café Aye “i te wā i whakatūwherahia te toa, neke atu i te kotahi rau mā waru ngā kaitono, ko te wāhanga uaua mo mātou ko te tohu i te tangata tōtika”.
Mo ētahi o ngā pakihi ki Rotorua ko ngā kaimahi pūkenga nui te wāhanga uaua. Ki ngā whakatau mo ngā tūranga mahi ki runga i a Trade me kua piki ake mā te tekau mā rima paihēneti mo te wāhanga tuatahi o tēnei tau. Ki tā Hikurangi Tahau, tētahi atu o ngā kaiwhakahaere o Kai Café Aye “ko te tohu i ngā tāngata tōtika, ko ta mātou ko te manaakitanga kei waho rā ētahi tāngata e hiahia ana ki te mahi i te mahi ko te tirohanga kē kia kuhu mai rātou i ngā kūaha hei mahi i te mahi”.
Mo ngā pakihi o Rotorua pēnei i a MDA Experience ko te tiro ki ngā huarahi auaha hei whiwhi kaimahi tōtika. Ki tā Takurua Mutu i roto i te wha tau, kotahi mano, rua rau, rua tekau ngā tūranga mahi hōu kua puta ki roto i ngā mahi tāpoi na whai anō me kimi i ngā huarahi auaha. “Kei te mahi tahi mātou me Toi Ohomai, ā, ko te mahi tahi me o rātou kaupapa tāpoi”. Mai i te timatanga o te tau, e toru ngā pakihi hōu kua tūwhera ki roto o Rotorua.
