He waitohutanga ahurea hou ka whakamanahia e te Kīngitanga me Ngā Kuki Airani

He whakahoatanga ā-ahurea hōu e tū ana ki waenganui Te Kīngitanga me Ngā Kuki Airani. He mea whakamana i te rā nei, i te waitohutanga o tētahi kawenata ki Tūrangawaewae Marae, i Ngāruawāhia.

Hei tā Tukuroirangi Morgan, “ko te rā nei hei āta whakatutuki i te tumanako a te Kīngi kia mahi tahi tātou o te Kīngitanga me te iwi o te Kuki Airani.”

Otia, he hoahoatanga a tātai whakapapa, i poipoia e Te Puea Herangi i tōna wā, i pupurutia e Te Arikinui Kahurangi Te Atairangi Kāhu, ā, e kawea tonutia i tēnei rā

Mā te waitohutanga nei, ka taea e rātou te ata wherawhera me pewhea rātou e mahi ngatahi ai, ko ngā kaupapa pakihi te aronga tuatahi

Hei tā Morgan, “He tīmatatanga noaiho tēnei, kāore anō mātou kia whai tēnei huarahi, kia totoro atu te ringaringa o te Kīngitanga ki ngā moutere o Poronēhia.”