He wānanga whakahonohono mā ngā Warriors

Rahia Timutimu

Ko te hau āwhiowhio a te kapa Warriors tērā i wawā ake rā ki te pou whakairo o Waitematā i te rangi nei.

Kua ūmere pai te tira nei ki runga i a Ngāti Whātua o Ōrākei hei whakakotahi i ōna rahinga i mua i te timatanga mai o tēnei tau tākaro.

E pūhakehake ana te ngākau o te heamana o Ngāti Whātua o Ōrākei, a Matt Maihi, i runga anō i te taenga mai o ēnei hautupua ki tōna kainga tupu. Me tana hiamo hoki ki te whakātu i ōna āhuranga katoa.

Mō tēnei mahuri tōtara o Te Taitokerau, mō David Bhana, kua tau tōna māuri i tēnei nohonga marae ā rātou, hēoi, e mōhio mārika ana ia ki ngā mahi nui kei tua i a rātou.

Ā ko tā tētahi o ngā ika-ā-whiro o te kapa, tā Kevin Locke, kua whai wāhi ki te whakakaha i te hononga ki te ika hou o te kapa, ki a Sam Tompkins, e kite mai ai tōna hua i runga i te papa tākaro.

He mea angitu tēnei kaupapa mo te tira kia noho tahi, kia kōrero tahi, kia whakawhanaunga i a rātou ano, a e rere haere tonu ana he mihi mutunga kore ki ngā uri o Orakei Marae.