He whaea pukumahi e whakaoti ana i te tohu tākutatanga Clinical Psychology

Tua atu i te whakatipu tamariki, te whakahaere kāinga, me te whai oranga mō tōna whānau, e mātiro atu ana a Pikihuia Pomare ki te otinga o tana tohu tākutatanga mo te Clinical Psychology.

He hīkoi roa, he piki he heke, engari he whāinga e kore e tutuki mēna kāre ngā tautoko a te whānau.

Ko ētahi mahi o te kaiwhakamātai hinengaro, he whakamātau he aha ngā raru o te hinengaro tangata, ā, he aha te take e pākia ana te hauora o te tangata.

Hei tā Pikihuia, “Ko tētahi atu ko te mahi kōrero haumanu, nō reira Therapy me kī, te ako i ngā momo, heaha te korero e tika ana kia whakaora anō i taua tangata, i tōna whānau hoki, whakakaha anō i te whānaungatanga i roto i tōna whānau, i te manaakitanga kia piki te ora me kī.”

I roto i tana hīkoi whai tohu mō ngā tau e whitu, tērā ngā uauatanga me ngā taumaha engari nōna te waimaria ki te whiwhi i ngā awhina a tōna whānau, ā, ko tōna teina a Hinewai tētahi tauira hauora anō e mārama ki aua taumaha.

Hei tā Hinewai, “Ko tā mātou he kaha ki te awhi i a ia ki te awhi hoki i āna tama e toru, nō reira ko au te whaea kēkē, ko tāku mahi he tiaki i a rātou, heri i a rātou ki a rātou kēmu whutupaoro, te āwhina hoki i taku tuakana ki te whakaoti i āna mahi, nō reira āe ko te tango i ētahi o wērā taumaha, kaha te tiaki i āna tamariki ērā momo mea, āe.”

Otirā, ko te wero a Pikihuia ki te hunga Māori e ngākaunui ana ki te whai i ēnei momo akoranga teitei o te taha hauora, ēnei mahi rangatira, kia kaha, whaia tāu e wawatahia ana.