He whāinga kia kōrero Māori ai te 80% o ngā uri Waikato-Tainui i mua i te tau 2050

Taroi Black

Kua whakarewaina e Waikato Tainui tō rātou kaupapa mō te tau rua mano rima tekau, arā, kia waru tekau ōrau o Tainui e matatau ana ki te reo. 

Ko Te Reo Māori te tino o ngā kaupapa Māori i roto o Waikato-Tainui. 

Hei tā rāhui Papa, "Kei roto i te reo, ko ngā tikanga me ngā kaupapa tuku iho mai i roto i o tātou mātua me o tātou tūpuna tatu mai rā ki tēnei rā."

Heoi ko te pātai, e hia ngā tāngata o Waikato Tainui e mātatau ana ki Te Reo?

"E toru tekau mā tahi orau e ai ki te tatauranga o Aotearoa.  Kare kē mātou i te tino whakapono ki ngā tatauranga o Aotearoa i te mea he nui ngā whāruarua kei roto," hei tā Papa anō.

I tū te hui ā tau a Waikato Tainui i te timatanga o tēnei wiki, ā, i tukuna te rua ira waru miriona tāra ki ngā kaupapa mātauranga.  Ka taka mai Te Reo Māori i raro i taua huarahi hōu. 

"Koia te tūmanako, ia rima tau kua piki ake mā te rua tekau orau o ngā tatauranga e kii ana he mōhio nō rātou, e mōhio no rātou rānei, he aro nui mai rānei ki tō tātou reo," te kii a Papa.

Hei tāna, koia tētahi o ngā tino wero kei mua i a Waikato Tainui, mo te hunga e noho tawhiti ana.