Kua toru tekau mā rima tau te whare whakaari o Taki Rua e whakaheke werawera ana ki te ao whakaari Māori. Ināianei kua puta i a rātau he whakaari reo Māori (katoa) mā te hunga mātakitaki pakeke. Ko tōna matū he whakakōrero i tētahi kōrero tawhito, ka tuia atu ki ngā taumaha o te ao hou.
Ko "He Kura e Huna Ana", he whakaari Māori e whakakōrero ana i te whakamomori.
Hei tā Te Puawaitanga Winterburn, (NgāPuhi, Ngāti Raukawa), “Kia whakaaturia ngā āhuatanga o te whakamomori, koinei ngā whakaaro o te tangata e mau nei i tēnei taniwha.”
Ka rarangahia te reo tāukiuki, te reo o mohoā nei anō hoki, arā rā, hei mirimiri i te taringa.
He kaiwhakaari a Nepia Takuira Mita, (Ngāti Rongomai, Ngāti Rangiwewehi), hei tāna, “Ko te whakaatu atu ki te motu i te rerehua o tō tāua reo ka tahi. Ka rua, he akiaki i te hunga rangatahi Māori me te mea atu he huarahi i roto i ēnei mahi māu.”
He mea tuhi te whakaari nā Hohepa Waitoa (Ngāti Porou, Rongowhakaata), ā, ko Nancy Brunning (Ngāti Raukawa, Ngāi Tūhoe) te kaitohutohu. Ko tā te whakaari nei he whakarite i ngā kōrero ō nehe ki ngā āhuatanga o te ao hou e pā ana ki te aroha, te mate me te pouri.
Hei tā Takuira-Mita, “Tirohia ki ō tīpuna kei reira hoki wētahi akoranga, waiho mā rātau mahi hei tūāpapa mā mātau i ēnei rā, kia puta ki te whaiao ki te ao mārama, kaua e noho ki te pōuriuri.
“E kore a muri e hokia, engari mā te aroha e mau tonu,” te kī a Winterburn.
Ka korowaitia te whakaari ki ngā taonga puoro hei whakarākei i ngā kōrero, otirā hei tohu i te horopaki.
Ko tā te kaiwhakatangi puoro a Sheree Waitoa, “Taku tino wawata inā kāre koe i te mōhio ki ngā kupu ka puta mai i te wā ka rongo koe i te oro ka mārama koe ki te wairua o taua āhuatanga.”
Ka tū te whakaari ki Tāmaki Makaurau tae noa ki te Rāhoroi kātahi ka kawea ki Kirikiriroa, ka mutu, ki Ngāmotu.
